Nuwe horisonne
Die reisiger Gerrie Pretorius verken ongewone bestemmings.
Die aanbieder-sanger Gerrie Pretorius se reismiere het hom die afgelope vyf seisoene na sowat 76 lande dwarsoor die wêreld geneem. Maar sy wanderlust is nog nie geblus nie.
“Daar’s nog baie plekke op my emmerlys wat ek wil besoek. Wanneer ’n mens reis verskuif jou grense en horisonne. Reis is seker die beste antidepressant en ouderdomskuur onder die son – en dit verwyder jou oogklappe,” vertel Gerrie.
In seisoen 6 neem Gerrie ons weer op ’n rondomtalie-reis na Portugal, Ysland, Frankryk, Hongkong en Jordanië, maar hy durf ook Afrika in ’n 4x4-voertuig aan. En hy beleef elke land se kultuur, kos en musiek eerstehands. Gerrie vertel hy wou met die nuwe seisoen Alaska en Antartika besoek. “Maar dis peperduur, die afstande is lank, en dit het nie by ons tydskedule ingepas nie. Ons het toe besluit om eerder Ysland, wat net soveel bekoring inhou, te kies,” verduidelik hy. In Ysland (episode 5) volg Gerrie en sy span die gouesirkelroete op die spore van die Vikings en leer meer oor die Skandinawiese seevaarders se geskiedenis.
“Ysland is asemrowend, en dit was ’n ongelooflike gesig om te staan waar die tektoniese plate van NoordAmerika en Europa wegbeweeg.”
Wanneer ’n mens ’n land se kultuur wil leer ken, moet jy ook die kos proe, glo Gerrie, en in Ysland was eksoties gefermenteerde haaivleis, ’n tradisionele gereg van die Vikings, op sy spyskaart. “Ek het ook tofoe, ’n ongefermenteerde wrongel van fyngemaakte sojaboontjies, in Hongkong [episode 8] geëet,” vertel hy. Gerrie wys in dié episode hoe die Chinese Nuwejaar gevier word.
AFRIKA OP SY BESTE
Afrika word nie agterweë gelaat op sy nuwe reis nie. “Ons besoek byvoorbeeld bekende nasionale parke soos die Khaudum Nasionale Park in Namibië [episode 11] en die Okavango.” Sutherland, die dorp met die koudste gemiddelde temperatuur in SuidAfrika, kom aan die beurt in episode 3. “Ons besigtig ook die eeu oue tradisie van die plaaslike skaapboere wat in die winter van die Roggeveld na die laagliggende Ceres-Karoo trek,” vertel hy. In episode 4 wys Gerrie waar jy oral op Afrika-bodem kan ski, hy besoek die Katsedam en ry die Sanipas uit.
WOESTYNE EN KANALE
Sy reis na Jordanië (episode 7) was ook ’n belewenis. “Ons besoek Petra, die verlore stad, en maak ’n draai in die Wadi Rum-woestyn, waar die fliek Lawrence Of Arabia (1962), met Peter O’Toole in die hoofrol, verfilm is.” In dié land volg Gerrie weer die voetspore van die Ou en die Nuwe Testament en besoek onder meer die berg Nebo.
Nog ’n hoogtepunt was ’n kanaalbootvaart in die suide van Frankryk (episode 12). “Ons onderneem die gewildste bootvaartroete wat in Toulouse begin en jou na die Middellandse See neem.” Wêreldstede soos Praag, Wene en Boedapest kom ook aan die beurt in ’n spesiale Wit-Kersfees- episode (episode 6).
“Met elke seisoen delf ons dieper en waag ons meer,” vertel Gerrie.