The Following
Seisoen 2 SABC3 (*193) 21:30 Aksie
Niks is te veel vir die donker aksiereeks The Following (2013-2015) nie, wat na gratis TV terugkeer met ’n dubbele ontwaking in seisoen 2. Die herstellende alkoholis Ryan Hardy (Kevin Bacon) het in seisoen 1 byna weer sy reeksmoordenaar-vyand Joe Carroll (James Purefoy) vasgetrek, maar toe is die ontsnapte gevangene in ’n bootwerf-ontploffing opgeblaas. In seisoen 2 is Ryan “nugter en gelukkig en het aanbeweeg met sy lewe”, sê Kevin. “Maar dis wanneer die moeilikheid weer by hom kom spook.”
Seisoen 2 begin met Joe se volgelinge – bekend as The Following – wat die herdenking van sy dood vier deur passasiers op moltreine aan te val. Ryan is nou ’n dosent aan ’n New Yorkse universiteit en weier om die FBI met hul ondersoek te help, maar ’n erger skok wag op Ryan en die wetstoepassers: Joe leef! En hy kruip nie eens weg nie . . . tegnies. Die gevalle Engelsprofessor verskyn met ’n baard aan die einde van episode 1 en hy gee weer klas, al is dit onder ’n skuilnaam.
Ryan word by die soektog na Joe betrek wanneer sy speurderniggie
Max Hardy (Jessica Stroup, Erin in die tienerdrama 90210, 2008-2013) aan die moltreinsaak werk. “Dis wanneer sy masker [klasgee] afval en die ou, minder stabiele Ryan weer na vore kom,” verklap Kevin. En die Carroll-vloek is nie verby vir die oud-FBIagent nie: sy eertydse liefie en Joe se eksvrou Claire
Matthews (Natalie Zea, Robin in die komediereeks The Detour, 2016-nou) is nie aan die meswond dood in seisoen 1 nie – sy wag vir Joe in ’n motelkamer in episode 9 (27 Junie). “Dit vang Joe en Ryan onkant,” sê Kevin, “maar dis nie al verrassing nie . . .”