Blue Planet II
Seisoen 2 BBC Earth (*184) 18:30 Dokkie
Mis jy die SABC2-natuurprogram 50/50 (1983-nou) terwyl dit ’n blaaskans neem? Maak dan seker jy kyk vanaand die spesiale finale episode van die bekroonde Britse program Blue Planet II (2017), met die bekende stem van sir David Attenborough as verteller. Blue Planet II is soveel meer as “net ’n dokumentêr”, verduidelik die vervaardiger Mark Brownlow telefonies vir ons. “Dis een van die hoogs aangeskrewe natuurreekse, en met goeie rede.”
Was dit intimiderend om saam met sir David te werk?
Ja en nee – hy is al vir meer as 50 jaar die indoena van natuurdokkies. Hy is die gesaghebbende stem en is nou betrokke by die produksie, van die skryf van tekste tot ’n duidelike visie vir die redigering van materiaal.
Dis besonder moeilik om met wilde diere te werk – wat het jy tydens verfilming geleer?
Dat jy nie die natuur kan voorspel nie en jy kry nie altyd daai “legendariese oomblik” nie. In 2014 het ons aan die Australiese kus begin verfilm, en die algemeenste vis wat jy sou verwag, het ons ’n maand lank nie gesien nie.
Kon jy alles wat jy beplan het in die vier jaar van produksie doen?
Nie naastenby nie. Meer as 90% van die oseane is nog nie verken nie. En hou in gedagte ons het ’n tydskedule en begroting gehad. Ons het darem seker gemaak ons begin in Antarktika, want dit was die mees afgeleë plek op ons filmrooster.
Jul tegniese hulpmiddels was seker gespesialiseerd vir jul behoeftes?
Ja, ons het baie tegnologie ingespan wat ons self ontwikkel het, soos ’n duiktoestel wat jou in staat stel om gebruikte lug te herwin. En ons het lense ontwikkel vir verfilming diep in die nag in die Golf van Kalifornië. Blue Planet II is regtig ’n uitsonderlike program met ongelooflike kamerawerk.