Veelsydige agent Phil
Agent Coulson is die koelste held in Agents Of S.H.I.E.L.D. – en hy’t nie eens supermagte nie!
Die Avengers-flieks (2012-nou) het gehore bekendgestel aan superhelde soos Thor en Iron Man (Chris Hemsworth en Robert Downey jr.). Maar daar’s ’n ou wat kop en skouers bo hulle uitstaan in Marvel’s Agents Of S.H.I.E.L.D. (2013-nou; seisoene 1-3 is op die aanlyn stroomdiens Showmax beskikbaar): agent Phil Coulson (Clark Gregg). Op die oog af lyk hy doodgewoon, maar innerlik is agent Phil ’n man van integriteit en eerbaarheid wat wil doen wat reg is. Dit geld ook sy spanlede, en Clark skerts “ons [agente] is die buffer tussen die wêreld en die mallighede daar buite. Ons is hier om die wêreld van die gekste dinge te red.”
ONTMOET DIE SPAN
Agent Phil werk nie alleen nie – en byna sy hele span het ’n gebrek aan superheld talente. “Hoewel Coulson nie magte het nie, het hy die spesiale vermoë van politieke mag om die agente te neem na waar hulle ook al in die wêreld nodig mag wees,” verduidelik Clark. Elke lid is vir ’n spesifieke vaardigheid gewerf. Jemma Simmons en Leo Fitz (Elizabeth Henstridge en Iain de Caestecker) is “Agent Fitz-Simmons” – sys’ ’n biochemikus en hy’s ’n ingenieur wat die span se tegno-speelgoed gereed hou vir oorlog. Melinda May (Ming-Na Wen) is ’n ekspert-vlieënier en ken haar storie met vegkuns. Agent Ward (Brett Dalton) is opgelei in gewapende stryd en spioenasie. En dan is daar Daisy (Skye) Johnson (Chloe Bennet), ’n kuberkraker wat digitale vernuf by die span voeg.
EK KOM TERUG
Dis nie ’n supermag nie, maar dis supercool – die S.H.I.E.L.D.-span weet nie agent Phil is in die Avengers-fliek dood nie. Om die waarheid te sê, hy weet self nie, verduidelik die reeksskepper Joss Whedon. Phil dink hy is vir ’n paar dae na die eilandparadys Tahiti gestuur om te herstel, “maar ons het ’n blink opwekkings-idee gekry. Sy baas, Nick Fury (Samuel L. Jackson in die Avengers-fliek), het ’n paar toutjies getrek deur alien-tegnologie te gebruik om hom te red,” verklap Joss. “Hulle het ook sy geheue aangepas sodat hy dink hy het in Tahiti van die Avengersalien oorlog gaan herstel.” Phil vind die waarheid aan die einde van die seisoen uit, maar hy verkies om dit te ignoreer.
ALLES VIR ALMAL
Agent Phil is ook die ou na wie toe almal gaan vir alles. Wat is so spesiaal daaraan? Wel, hy’s ’n pa, werktuigkundige, mentor, die spanleier, hy reël IT- goeters vir Fitz-Simmons, hy kry wapens en ammunisie en Clark sê “hy is sonder twyfel die vader van die span. Hy kyk na hulle soos na sy eie gesin – en hy het soveel persoonlikhede, van die snaakse en die huilerige tot die wraakgierige en die cool kêrel Coulson. Goed, miskien nie die laaste een nie . . .”
VLIEËNDE WONDER
Agent Phil het vir homself die beste plek bespreek op The Bus, alias die vragvliegtuig waarin die S.H.I.E.L.D.agente na hul sendings vlieg. Van buite lyk dit soos ’n gewone vliegtuig, maar binne is dit ’n mobiele bevelsentrum waar die span aan die werk spring. Dis ook die tuiste van Lola, agent Phil se geliefde rooi Chevrolet Corvetteafslaankap motor met’ n geheim van haar eie. “Lola is nie net ’n versamelaarsitem nie, weet jy? Mense is geneig om die woorde nuut en verbeter te verwar,” skimp agent Phil teenoor Ward in seisoen 1 episode 22. Maar selfs nie Ward verwag om Phil te sien wegvlieg in Lola nie . . . Inderdaad, ’n mens hoef nie ’n genetiese genie te wees om so super soos agent Phil te wees nie!