Dokter, dokter
Alexa is briesend wanneer Fikani haar kollega by die Hillside-kliniek word.
7de Laan Weekdae SABC2 (*192) 18:00
Alexa (Carina Nel) stamp al sedert Maart koppe met die T&T-sportwinkel- eienaar Fikani (Nicolas Nkuna) nadat hy in ’n skokonthulling verklap het hy is ’n gekwalifiseerde dokter en chirurg [meer in kassie hieronder]. En dinge gaan verder tussen hulle versuur omdat Alexa, wat self ’n dokter by die Hillside-kliniek is, bedreig voel wanneer Fikani op Woensdag 9 Mei as haar kollega aangestel word.
’N YSLIKE FOUT
“Alexa vertrou Fikani glad nie,” sê Carina. “Fikani het jare lank nie gepraktiseer nie en hoewel die rede daarvoor nog nie aan die lig gekom het nie, glo Alexa iets ernstigs moes gebeur het wat hom die professie laat verlaat het.”
Alexa glo die enigste rede waarom die kliniek Fikani aangestel het, is omdat hy op Vrydag 4 Mei in ’n noodgeval ’n operasie suksesvol uitgevoer het. Alexa het nog nie alleen geopereer nie en omdat die kliniek weet Fikani is ’n chirurg, het hulle hom gevra om die noodoperasie te doen, al is hy uit oefening uit.
“Alexa laat Fikani (teen die einde van Woensdag 9 Mei) mooi verstaan sy dink sy aanstelling is ’n reuse-fout en die kliniek gaan dit nog berou.”
’N TWEEDE KANS
Nicolas sê Fikani is ontsteld deur Alexa se vyandigheid teenoor hom, “maar hy gaan nie die tweede kans wat hy gekry het om ’n dokter te wees, deur sy vingers laat glip nie”. Hy begin op Maandag 14 Mei na ’n plaasvervanger soek om T&T te bestuur terwyl hy aandag aan sy nuwe werk gee. Fikani oorweeg dit om
Willem (Marcus Haywood) te nader, maar weet nie of hy dit sal aanvaar nie.
Intussen is dinge nog krapperig tussen Alexa en Fikani op Dinsdag 15 Mei, en ons wonder of Alexa ooit die strydbyl gaan begrawe. Carina sê: “Hopelik, soos die tyd aanloop en Fikani homself aan haar kan bewys, sal Alexa dalk van haar vyandigheid teenoor hom laat vaar.”