Stylvolle speurders
Om skurke te arresteer het nog nooit beter gelyk as in Miami Vice nie.
Miami Vice Seisoen 2 Vrydae SABC3 (*193) 12:00 (begin 18 Mei)
Speurders Crockett en Tubbs (Don Johnson en Philip Michael Thomas) is die koelste katte in die Miamipolisiedepartement wanneer seisoen 2 van Miami Vice (1984-1990) in die volgende twee weke begin. “Ons het net gekliek,” onthul Don. “Ek het ’n vyf minute lange oudisie met Philip gehad en teen die einde van seisoen 1 het dit gevoel ons ken mekaar al jare. En jy kan daai vonk sien – ons het uitgekyk vir mekaar. Jy moes wanneer jou werkdag 16 uur lank was. Dit het ons onderskei van ander reekse.”
LYK GOED
Miami Vice het TV-uniforms vir altyd verander, lag die twee akteurs. Don sê: “Dit was aaklig. Ek dra ’n baadjie, met ’n holster, met sokkies. Ek het seisoen 2 kom werk sonder sokkies, in ’n V-nekhemp en met my baadjiemoue opgerol, want dit was so bedompig.” Philip voeg by: “Ons was stylvol met alles – tegnologie, talent en musiek. Ons het nie by die norm gepas nie. G’n speurder hol rond in Versace nie, net ons!”
BEPAAL DIE STANDAARD
Vanweë seisoen 1 se sukses het borge tou gestaan om hul produkte vir seisoen 2 aan te bied. Don het niks van sy karakter se pistoolhouer gehou nie en die Jackass Leather Company se voorsitter het persoonlik vir hom een geskep, “The Miami Classic”. Die wapenhandelsmerke Smith & Wesson en Glock se vuurwapens is in seisoen 2 begin gebruik. “Maar die beste was die motors,” sê Don, met sy karakter Crockett “wat meisies optel in my Ferrari. Dit was oulik!”