Komiese ruimtevlug
Reis saam met Die Vlieënde Springbokkie na B-Aarde.
Die Vlieënde Springbokkie Seisoen 1 Maandae SABC2 (*192) 19:00 (begin 14 Mei)
Dit is die jaar 2068 en die aarde is oorbevolk en die hulpbronne byna uitgeput. Mars blyk toe nie so aanloklik te wees as wat almal gedink het nie. Maar daar’s ’n ander planeet, B-Aarde, waar die aardse wesens hulle wil hervestig. Dit word ’n wêreldwye wedloop in die ruimte om hierdie planeet eerste te bereik. ’n Groep wetenskaplikes, astro-fisici en ruimteskipbouers ontwerp ’n ruimteskip op aarde, Die Vlieënde Springbokkie, om die geskiedkundige reis na B-Aarde te onderneem. Die hele land staan bankvas agter Die Vlieënde Springbokkie en die ses bemanningslede, maar die ruimtereis verloop nie sonder talle komiese gebeure en intriges nie.
MENSE, GEDIERTES EN BEVRORE LIGGAME
’n Reuse-ateljee wat soos die binnekant van ’n regte ruimteskip lyk, is die laaste paar maande by Urban Brew Studios se nuwe ateljees en kantore in Randburg gebou en met outentieke toerusting afgerond vir die verfilming van die reeks. Buiten die ses bemanningslede wat met die hand uitgesoek is, is daar ’n kamer vol gediertes wat saamgaan na B-Aarde, asook bevrore liggame van bekende persoonlikhede – en selfs ’n voormalige president, Kabenga Fourie.
“Die huidige president in 2068 maak haar verskyning in episode 9 en word deur Doreen Morris vertolk. ’n Paar ander liggame word tydens die reis ontvries en word deur verskillende akteurs vertolk,” vertel Burgert Müller, vervaardiger by Urban Brew Studios.
ONTMOET DIE BEMANNING
In die toekoms word mense nie meer volgens ras geklassifiseer nie, maar slegs volgens hul IK (intelligensiekwosiënt) en EK (emosionele intelligensiekwosiënt).
FJ (THANDI PUREN) IK = 5; EK = 5
FJ (40) is die dominerende kaptein. Sy het die perfekte gemiddelde en is die gesig van versoening. “FJ probeer al die probleme oplos, maar wanneer die bemanning dit uiteindelik self uitgestryk kry, neem sy die krediet vir haarself,” vertel Thandi. Haar dogter Lisa (Liza Scholtz) reis saam. FJ flankeer met die hele wêreld, maar haar enigste vertroueling is OOM (die stem van Riaan Cruywagen), ’n rekenaar wat via die aarde met haar kommunikeer en al die antwoorde het.
LISA (LIZA SCHOLTZ) IK = 8; EK = 8
Lisa is ’n ingenieur, ’n werkesel en perfeksionis. “Haar werk is haar lewe en die ruimtevlug is haar grootste uitdaging tot dusver,” vertel Liza. “Sy wou eintlik wegkom van haar oorbeskermende ma, FJ, maar toe beland hulle saam op dieselfde ruimtevlug.”
PAT (ANTOINETTE KELLERMAN) IK = 5; EK = 9
Pat is ’n hoogs intelligente wetenskaplike, plantkundige en terapeut. “Pat het nie ’n ouderdom nie, sy is tydloos. Sy was al 15 keer getroud, is baie seksueel ingestel en hoogs verveeld met die lewe,” sê Antoinette. “Sy wil eintlik doodgaan en slaap elke nag in ’n doodskis. Wanneer daar ’n situasie opduik wat lyk of dit op haar dood kan afstuur, raak sy opgewonde.”
FARREL (WESLEY LAUDER) IK = 4; EK = 4
Farrel is die gesondheidsen veiligheidsbeampte. Hy is lieftallig en het geen kwade bedoelings nie. “Hy ly ’n bietjie aan FOMO [fear of missing out], dat hy iets spesiaals of prettigs sal misloop,” verduidelik Wesley. “Hy is verveeld met die smaaklose ruimtekos en probeer hard om op die ruimteskip te braai.”
MOSSIE (NIKOLAI MYNHARDT) IK = 7; EK = 7
Die selfversekerde Mossie is ’n avontuurlustige astroloods. Hy het al meer as 2000 ure op aarde gevlieg. ”Op skool was hy die vet seun wat gespot is en hy het toe kwaai begin oefen,” vertel Nikolai. “Hy is die haan onder die henne, onnutsig en bak gereeld poetse.”
MAK (DAVID ISAACS) IK = 207; EK = 1
Mak is die slimste bemanningslid met ’n string grade agter sy naam. Hy is tweede in beheer van die ruimteskip. Sy emosionele intelligensie is baie laag en hy hou nie eintlik van mense nie.