Republiek wat rock
Die rock chic is terug met meer klets, komedie en musiek.
Republiek Van Zoid Afrika Seisoen 5 Donderdae kykNET (*144) 20:00 (begin 10 Mei)
Dis tyd vir president Karen Zoid om haar kabinet met parlementslede – of dan eerder bekende persoonlikhede – uit te brei. Oudergewoonte word die onderhoude met komiese skerpsketse afgewissel en treffermusiek rond alles af. “Ons poog met elke seisoen om op die vorige een te verbeter,” sê Karen. “Jy kan nooit terugsit en dinge as vanselfsprekend aanvaar nie. Die nuwe stel is groter en ons tegniese span het hul talente verder ontwikkel.” En kykers kan weer heelwat humor, roerende oomblikke en bobaasmusiek te wagte wees, belowe Carien Loubser, die vervaardiger en regisseur van die gewilde program.
GESELLIGE KUIERS
Daar’s meer as een rede waarom Republiek Van Zoid Afrika so ’n groot aanhang het. Dis in 2016 en ook vanjaar met ’n SAFTA-prys vir beste gespreksprogram bekroon, en het ook al ’n paar Huisgenoot Tempo-toekennings ingepalm. Karen skryf hul sukses hoofsaaklik toe aan die informele styl en gevoel. “Die gaste gesels in ’n gesellige, warm sitkamer waar ons een minuut grappies maak en die volgende oomblik diep dinge deel. Elke gesprek ontvou en vloei soos die gevoel ons lei. Dit gaan vir my meer oor die samesyn as die onderhoude. Ons almal smag daarna in die moderne digitale era,” voeg Karen by.
NOG TREFFERLIEDJIES
Karen is opgewonde oor haar gaste in seisoen 5. Sy wil nie uitlap wie almal by haar gaan kom hart uitstort nie, maar verklap ’n paar lusmakertjies. “Ek voer ’n onderhoud met die gevierde musikant Johnny Clegg. Daarby het ek Patri
cia Lewis oorreed om die eerste keer in sewe jaar te sing. En ek sing in Swahili saam met Yvonne Chaka Chaka.” (Episodenommers nog nie vasgestel nie).
Soos met die vorige seisoene word die liedjies wat Karen aan die einde van elke episode saam met ’n bekende sanger sing, onmiddellik in Apple se iTunes-aanlynmusiekwinkel beskikbaar gestel. Van die treffers, soos Karen en Francois van
Coke se liedjie Toe Vind Ek Jou, het al bo-aan trefferlyste gepryk.
Sy kies die musiek noukeurig. “Ek maak voorstelle aan die sangers, en dan besluit ons saam op ’n liedjie. Ek verwerk al die musiek saam met my band en daarna repeteer ons ’n paar keer voor die opnames.”
MARINDA EN KIE IS TERUG!
Die reeks is ’n platform vir Karen se verskeie talente. Sy het in 2001 drama aan die AFDA-filmskool in Johannesburg studeer en het in 2010 die naamrol in Franz Marx se fliek Susanna Van Biljon vertolk. Karen is mal oor toneelspeel, veral komedie. “Ek spot graag met aktuele sake in ons samelewing, en die reeks gee my die kans om dit uit te leef.”
Karen vertolk verskillende rolle in die skerpsketse: Sy is die panfluitsensasie Marinda Senekal met haar HolrieteCD in Keeping Up With Marinda, die skreeusnaakse mini-realiteitsreeks oor Marinda en haar ma, Muisie (Esther von Waltsleben), en kleinsus,
Mielie (Llandi Beeslaar). Karen is ook Annemari Ferreira, wat in ’n draakstekery boererate vir bands gee. “Die insetsels is honderd persent impromptu. Carien skep vir ons ’n scenario en dan moet ons improviseer,” verduidelik Karen.
Republiek Van Zoid Afrika het haar stoutste verwagtinge oortref. “Toe ek destyds in die strate van Melville begin musiek maak het, het ek nooit kon droom ek sou ooit eendag op TV wees nie,” sê ons eie rock chic. “Ek voel baie geseënd om myself vandag ’n professionele musikant te kan noem. En om my eie reeks te hê en saam met ons land se beste sangers in die reeks te sing, is net ’n bonus.”