Nuwe liefde
Kosie het sy oog op ’n spesiale meisie.
7de Laan
Weekdae SABC2 (*192) 18:00
Kosie (Kosie Schoeman), ’n downsindroom-man, is al die afgelope elf jaar deel van die 7de Laan-familie. Hy maak gereeld sy verskyning om vleis- en kaasprodukte van Swannie se slaghuis by Oppiekoffie af te lewer. Vanaf Donderdag 24 Mei word sy storielyn groter wanneer sy oog op ’n spesiale meisie val. Maar eers is daar ’n groot misverstand tussen Kosie, Olivia (Nadia Herbst) en
Rickus (André Lotter) wat opgeklaar moet word.
DIE EINTLIKE EEN
Die boekwinkelassistent Olivia was sedert Maandag 21 Mei onder die indruk Kosie maak vir haar ogies wanneer hy haar in Oppiekoffie sien. Olivia besluit op Woensdag 23 Mei om haar kêrel Rickus daarvan te vertel, en hoop hy sal Kosie op ’n mooi manier laat verstaan sy het ’n ou. “Maar my karakter stel nie in Olivia belang nie, hy hou van Liezl [Liezl Geldenhuys],” vertel Kosie.
Liezl, ’n oulike downsindroom-meisie, is toevallig elke keer in Oppiekoffie wanneer Olivia en Kosie daar is. Wanneer Rickus dus dieselfde dag vir Kosie wil konfronteer, wys Kosie hom gou die meisie by wie sy hart eintlik lê.
RICKUS MAAK ’N PLAN
Rickus kry skaam wanneer hy besef dit was ’n groot misverstand. En om jammer te sê belowe hy Kosie hy sal hom help om Liezl uit te vra. Rickus nader Liezl op Donderdag 24 Mei in Oppiekoffie en vertel haar hoe oulik Kosie is en dat hy baie van haar hou. Kosie en Liezl ontmoet later die dag en besluit om op ’n afspraak te gaan. “Kosie kan nie ophou staar na Liezl nie,” sê Kosie, en voeg by hy hoop ons gaan nog baie van Kosie en Liezl in die toekoms sien.
’N DROOM WORD WAAR
Die 26-jarige Liezl, wat in die Paul Jungnickel-tehuis vir volwasse gestremdes in Pretoria woon, was baie opgewonde toe 7de Laan haar familie in Maart nader om in die sepie te verskyn. “Ek het al my woorde uit my kop geleer,” sê sy skamerig. Sy het vinnig vriende gemaak op stel, veral met haar gunstelingkarakter Connie (Quinne Brown Huffman), en sy en Kosie het selfs op haar verjaardag in Maart saam gekuier. “Ek weet nou ek kan ’n aktrise wees,” sê sy trots.