’n Troue om te onthou
Vergeet van wit en voorspelbaar – The Wedding Bash(ers) volg hul eie kop met cool en onkonvensionele seremonies.
Twaalf episodes. Twee- en-twintig uiteenlopende troues. En 22 bruide en bruidegomme wat alles uithaal om hul perfekte dag te skep. Dis die storie agter die realiteitsprogram Wedding Bash(ers) (2017-nou; seisoen 1 is beskikbaar op die aanlyn stroomdiens Showmax). Dis nie net die prettige wedywering wat heerlike kykgenot is nie – dis ook dat die paartjies nie hou by die tradisionele en beproefde wit-in- die-kerk-resep nie. Wat is op die spel? ’n Nie te versmaai nie R800 000 (bestaande uit kontant en ander pryse soos juweliersware en ’n wittebrood).
Hoe beoordeel ’n mens iets wanneer alles so uiteenlopend is en smake aansienlik verskil? Jy kry kundiges wat by elke groot dag “inbars” en elke element van die troue ontleed. Die plaaslike kosghoeroe Siba Mtongana bekyk en proe die spyskaart en allerbelangrike koek. Die troubeplanner Zavion Kotze kyk met sy kennersoog na die verloop van die hele dag en sien gou die maakof-breek faktor raak. Die partytjieprinses Denise Zimba besluit oor die atmosfeer, musiek en ander vermaaklikhede by die onthaal. En die gewese Mej. SA Cindy Nell fokus op die trouuitrustings, bykomstighede, detail en laaste afronding. Maar ’n troue is nie net ’n partytjie nie, beklemtoon De- nise. “Ons geniet die troues en seremonies en onthale, want niks kom daarby om in ’n plek te wees waar die liefde bo alles uitstaan nie.” Dit het Cindy se hartsnare ook geraak, en die oudmodel voeg by “hulle het ons nie probeer beïndruk of iets probeer voorgee wat hulle nie is nie. Hul troudag is spesiaal vir elk van die paartjies.” En dit maak nie saak hoe “onkonvensioneel” dit is nie, soos die volgendes . . .