Gee wat my toekom
’n Versmade Mulalo sal die koninklike familie vernietig as dit beteken hy kan sy mag en rykdom terugkry.
Muvhango Weekdae SABC2 (*192) 21:00
Muvhango se gevestigde stamhoof Azwindini (Gabriel Temudzani) en sy koninklike Vhakwevhofamilie beter in hul pasoppens wees op Woensdag 4 Julie wanneer hulle ’n waarskuwing van hul sangoma Mulimisi (Humbulani Tsharani) kry: moeilikheid is op pad wat hulle dalk nie sal kan trotseer nie. Die oudburgemeester Mulalo (Sydney Ramakuela) het op Azwindini spioeneer en weet van die “eerbare” stamhoof se geraamtes in sy kas, soos sy liefdeskind Ndiwanga (Gabrielle Taiwo) by Livhuwani (Anzani Tshivhase), wat nogal getroud is met die huidige Thatheburgemeester, Tenda (Nat Ramabulana). “Mulalo gaan die inligting gebruik om Livhu te ontsenu [op Donderdag 5 Julie]. Hy teiken haar om Azwindini by te kom sodat die stamhoof deeglik bewus is van wat hy weet. Mulalo soek ’n setel in die koningshuis en die rykdom wat daarmee saamgaan,” sê Sydney.
GEWONDE DIER
Mulalo is op die oorlogspad sedert hy uitgestoot is in die 18-maande-tyd- sprong in Muvhango se storielyne in Maart vanjaar, en dit het die eens vriendelike burgemeester in ’n ingehokte dier verander. “Hy het gewoond geraak aan die mag en om mense na sy pype te laat dans,” sê die akteur. “Mulalo is soos ’n gewonde buffel – hy het niks om te verloor nie en dis ’n baie gevaarlike man om mee swaarde te kruis.” Mulalo wil hê sy vyande moet weet hy gaan hulle aanvat, daarom besoek hy die burgemeesterskantoor op Woensdag 11 Julie en waarsku Tenda om nie die stamhoof te vertrou nie. “Mulalo wil Azwindini in diskrediet bring en twyfel by Tenda laat ontstaan oor Livhu se getrouheid,” verklap Sydney.
WAARHEID EN WRAAK
Azwindini ruik ’n rot en konfronteer Mulalo op Vrydag 13 Julie en sê hy moet ophou saadjies van agterdog saai. ’n Briesende Mulalo gaan vertel Tenda nog dieselfde dag alles. “Mulalo hoop as hy Livhu se ontrouheid onthul, sal hy ’n bondgenoot teen Azwindini kry,” verduidelik Sydney. Maar Tenda gaan nie vir die gek gehou word deur die man wat hy vervang het nie, en trek los met sy eie tirade op Maandag 16 Julie. “Mulalo het nooit verwag om so behandel te word nie,” sê Sydney. Tog lag hy in sy mou, want hy weet dis nie lank voor Tenda die waarheid aanvaar nie en dan gaan hy wraak soek.