Dinamiese talent
Tinarie is tans in twee uitdagende rolle te sien.
Onder Die Suiderkruis Seisoen 1 Dinsdae SABC2 (*192) 19:00 Fynskrif Seisoen 1 Dinsdae kykNET (*144) 20:00
Jy kan Tinarie Van Wyk Loots (38) nie miskyk nie. Sy is talentvol, beeldskoon en tans in twee TVrolle op Dinsdagaande te sien: as die doelgerigte prokureur Lara van Wyk in kykNET se nuwe regsdrama Fynskrif om 20:00, en net voor dit, om 19:00, as die rebelse bedorwe brokkie Skye Smithyman in die SABC2-dramareeks Onder Die Suiderkruis. “Lara en Skye is uiteenlopende karakters, maar elke rol was ’n leerskool vir my,” vertel sy.
KLINIESE REGSVROU
Fynskrif het Tinarie ’n eerstehandse kykie in die regsberoep gegee. “Ek dink nie ek sou ’n prokureur kon wees nie,” erken sy. “Ek het op skool aan debatte en redenaarskompetisies deelgeneem en kon myself goed as spreker handhaaf. Die regswêreld is te swart en wit, en ek twyfel of ek in so ’n struktuur sou kon funksioneer. Boonop is ek emosioneel en sou persoonlik by die kliënte se sake betrokke geraak het, en in ’n regspraktyk is daar nie plek daarvoor nie.” Nie dat jy dit sal sê as jy na die doelgerigte, byna koue Lara kyk nie! Waar Tinarie ’n babbelkous is, praat Lara net wanneer dit nodig is – en dan met nadruk. Maar Lara het haar swak punte, sê Tinarie. “Lara sukkel soms om haarself behoorlik uit te druk. In ’n sekere sin is sy ook baie rigied: dit is háár manier of geen manier.”
EIEWYSE PLAASMEISIE
As Skye Smithyman, die enigste en eiewyse dogter van die wewenaar-boer en sakeman
Don Smithyman (Deon Lotz) in Onder Die Suiderkruis, is sy in haar vroeë twintigs en amper kinderlik, vertel Tinarie. Om heelwat jonger te lyk het die aktrise ’n verlengde haarstuk gedra om haar pixie-haarstyl te verbloem. “Hoewel Skye baie intelligent is, het sy nie emosioneel ontwikkel nie. Sy moet nog baie dinge oor die lewe en die liefde uitpluis en haar oorbeskermende pa oorskadu haar.” Omdat Skye tuisonderrig ontvang het, het sy hoofsaaklik tussen volwassenes grootgeword. “Sy maak nie maklik vriende met mense van haar ouderdom nie en is geneig om haar ten volle by haar werk in te gooi,” vertel Tinarie.
TEATERREGISSEUR
Die aktrise verken graag nuwe horisonne en was die afgelope paar maande regisseur van die verhoogstuk Swerfgoed, wat landwyd by kunstefeeste opgevoer word. Dié drama handel oor die aktuele waterskaarste en het tot op hede uiteenlopende reaksie by teatergangers ontlok. “Verhoogregie is ’n uitdaging wat ek baie geniet, maar dis terselfdertyd vreesaanjaend. Ek sal nog nie my hand aan TV-regie waag nie, want ek het nie genoeg kennis van die tegniese sy van die bedryf nie,” sê sy. Maar dit lyk of die dinamiese vrou enigiets kan baasraak wat sy aanpak.