So vlieg die tyd
Tbose en Kwaito kom ’n lang pad die afgelope sewe jaar.
Dit was ’n wilde tyd vir Skeem Saam en sy karakters in Turfloop vandat dit in 2011 as ’n weeklikse drama begin het en teen 2014 een van SA se mees gekykte weekdagsepies was. Die kinders, wat eers hoërskoolleerders was, is nou byna almal volwasse, en as jong grootmense is hulle op die punt om te gaan werk. “Kykers was al die pad saam met hulle,” sê die hoofskrywer, Lunga Hadebe. Met seisoen 7 wat pas begin het, het ons met Cornet Mamabolo en sy beste pel op skerm, Clement Maosa, gesels om van hul karakters, Tbose en Kwaito, se reis na volwassenheid uit te vind.
GROEIPYNE
Tbose is van die begin af fyn dopgehou toe hy die sepie begin het met ’n noodlottige tref- en-trapongeluk wat sedertdien by hom spook. Dit het in 2014 nie beter met hom gegaan nie – die tienerpa se streng ouers, Meikie en
John (Harriet Manamela en Africa Tsoai), het teen hom uitgevaar omdat hy so onverantwoordelik was, maar dit het sy karakter help ontwikkel, verduidelik Cornet. “Tbose moes sterk word en op varsity het hy sy prioriteite reggekry. Hy wil ’n bestendige omgewing vir sy jong seun skep,” voeg die 28-jarige by. Al het hy ’n oudisie afgelê vir Kwaito, sê Cornet Tbose is ’n seën, want “soos my karakter moes ek ook grootword. Daarsonder sou ek my kans misgeloop het om ’n sakeman te word en ’n eie finansiële- dienstemaatskappy te open.”
ARMOEDIGE BESTAAN
Anders as Tbose se ryk familie het Kwaito grootgeword met baie min geld en hy moes die man in die huis wees sedert sy onverantwoordelike pa, Lucas (Patrick Shai), hulle in 2014 verlaat het. “Kwaito moes oornag groot- en verantwoordelik word en hard werk om vooruit te kom,” sê Clement. Maar moeilikheid het hom soos ’n skadu gevolg – in 2013 het sy eksmeisie Lelo (Amanda du-Pont) die aspirant-skrywer se roman gesteel vir die tantième, en in April vanjaar is sy ingenieursprojek gesteel deur sy dosent mnr. Spiller (Jürgen Hellberg), wat ná die tyd vermoor is. “Sy familie het vertroue in homverloor, maar Kwaito is vasbeslote om suksesvol te word,” sê die 30-jarige Clement.