Kostelike kuierplek
Rina en kie het eersteklas lagmedisyne vir ’n blou Maandag.
Die Marico-streek in Noordwes is ’n taai wêreld met taai mense: Almal werk hard en speel hard. In Ottoshoop in Marico is die fiktiewe kuierplek Moeggeploeg waar die gelyknamige reeks afspeel, en waar die kleurryke inwoners van die dorp hul lewenswel en wee met mekaar deel. “Omdat Ottoshoop ’n afgeleë plek is, is mense baie op mekaar aangewese en hulle kom gereeld bymekaar,” vertel die aktrise Rina Nienaber wat Moeggeploeg (2013) saam met haar man, Dick Voorendyk, geskryf het.
BEKEND EN BEMIND
Die Noordwes-provinsie en sy mense is nie onbekend vir Rina en Dick nie. “Dick kom oorspronklik van Noordwes en ons het ’n wegbreekplek tussen Mahikeng en Lichtenburg. Daar’s juis ’n gewilde kuierplek, Die Gat, waar inwoners bymekaarkom om hul dors te les, en dis waar ons die idee gekry het vir die reeks,” vertel Rina.
Die loodsepisode van Moeggeploeg is in Die Gat verfilm, maar om praktiese redes kon die hele reeks nie daar geskiet word nie. ’n Kroeg in Honeydew, Johannesburg, is as plaasvervanger ingespan. “Ons het probeer om dieselfde atmosfeer as in Die Gat te skep,” voeg Rina by.
Interessante en eksentrieke karakters hang in Moeggeploeg uit saam met die eienaar, Vlok Vorster (Ben Kruger), en sy vrou, Vlerkies (Rina Nienaber). Daar is die barbier Dier Olivier (Marcel van Heerden), die jong melkboer Myburgh Cilliers (Chris van Rensburg), die stoepboer oom Kalfie
Sonnekus (Cobus Visser) en Glenda (Leandie du Randt Bosch), Vlok en Vlerkies se rock- enbiker- chick- dogter. Die wulpse kelnerin
Lulu Vermaak (Hanna Grobler) staan reg om almal te bedien en die kok Zoutevis (Jan Engelen) maak amper meer geselsies as kos. “Party van die name wat ons gebruik is name van mense wat ons werklik ken, maar die karakters is almal fiktief,” verduidelik Rina.
HORLOSIE STAAN STIL
Moeggeploeg is in 2013 op kykNET uitgesaai, maar volgens Rina staan die tyd eintlik stil in hierdie deel van die wêreld en behoort die karakters nog net so snaaks as vyf jaar gelede vir kykers te wees.
Sy voeg by die resep van Moeggeploeg het destyds goed gewerk en nie veel verouder nie. “Daar’s ’n eerlikheid aan elke karakter. Elkeen is komies op sy of haar manier en het ’n hart.”
Die akteurs stem saam. “Ek is seker mense gaan oor tien jaar steeds na Moeggeploeg kan kyk en lag,” sê Hanna. Marcel beaam: “Ondanks moderne tegnologie dink ek baie van daardie mense se lewe het nie juis verander nie.”
Moeggeploeg was vir Leandie ’n verfrissende ondervinding. “Dit was lekker om vir ’n verandering nie weer die poppie te speel nie, maar ’n rowwe chick,” sê sy.
Hanna en Leandie het goeie vriendinne geword toe hulle in 2009 saamgespeel het in Getroud Met Rugby (2009-2010, 2012-2015) toe dit nog ’n dramareeks was. Hanna was Kiki en Leandie Mieke. “Omdat ons mekaar toe al goed geken het, het ons baie pret op die stel van Moeggeploeg gehad en mekaar soms regieriglyne gegee,” vertel Hanna.
“Die lewe is so gejaagd en onderstebo, dis nodig dat mense baie lag,” sê Rina wat almal laat skaterlag as Koekie in die sepie Getroud Met Rugby (2016-nou). En as die karakters van Moeggeploeg Maandagaande in jou sitkamer kom kuier, kan dit nie anders nie.