’n Tweede kans
Clare Wiese-Wentzel is terug en help vroue om hul skoonheid te herontdek.
Die tweede seisoen van die leefstylreeks Mooimaak (2017-nou) is terug op die kassie, met episodes wat nou ’n uur lank is. Die reeks transformeer vroue wat deur lewensomstandighede afgerem voel, van ’n vaal voorkoms tot hulle weer van selfvertroue straal deur van nie-indringende prosedures gebruik te maak. Elf vroue word deur die aanbieder Clare Wiese-Wentzel en haar span deskundiges onder hande geneem om weer hul lewensvreugde terug te kry.
Watter terugvoer was daar oor seisoen 1?
Dit was oorweldigend positief. Wat ons doen is redelik nuut vir die SuidAfrikaanse gehoor, dus was die feit dat hulle die idee van Mooimaak met ope arms ontvang het, verblydend.
Watter transformasie in seisoen 1 was vir jou ’n hoogtepunt?
Hoewel ek nie een deelnemer se transformasie meer spesiaal wil ag bo die ander nie, dink ek ons grootste suksesverhaal was met
Patricia Viviers
in episode 8. Sy het baie gewig verloor, haar glimlag het haar fantasties laat lyk en haar vel, hare, stilering en grimering het alles bygedra tot ’n verstommende resultaat. ’n Paar mense het ons op sosiale media daarvan beskuldig dat die voor- en ná-foto’s nie van dieselfde mens geneem is nie – wat vir ons ’n groot kompliment is.
Hoe het die reeks jou persoonlik geraak?
Ons het besluit om vir seisoen 2 na die deelnemers se huise te gaan, waar ek die eerste onderhoude met hulle voer. Dit het my nog meer geraak as in die vorige seisoen om hul omstandighede van naby te beleef. Hulle kon vir my foto-albums wys van spesiale geleenthede, soos troues, waar hulle mooi gevoel het en trots was op hul voorkoms. Ek kon op foto’s sien hoe hul geliefdes lyk, en ’n beter prentjie kry van wat Mooimaak vir hulle kan beteken.
Hoeveel inskrywings het julle vir seisoen 2 gekry?
Baie meer as ’n duisend – en mense het net twee weke gehad om in te skryf. Ongelukkig was daar baie min inskrywings van mans. Dié wat wel ingeskryf het, se grootste probleem was haarverlies. En hoewel dit iets is waarmee Skin Renewal (die nie-indringende behandelingspraktyk) kan help, is dit nie regtig die fokus van ons behandelings nie.
Watter soort prosedures gaan kykers in seisoen 2 sien?
Ons maak baie gebruik van seisoen 1 se velbehandelings – soos neuroksien, dermale vullers, laserbehandelings en chemiese afskilferings. Maar die behandelings is meer intensief en, waar ons kan, gaan dit langer aangewend word vir beter resultate. Die seisoen fokus ons ook daarop om deelnemers se algemene gesondheid te verbeter deur middel van slaapstudies en osoonbehandelings, en kykers sal meer daaroor te wete kom.