Chicago PD
Seisoen 4 e.tv (*194) 20:30 Aksie
Daar is ’n rede waarom die meeste reekse oorkruisepisodes doen: om die waters te toets vir moontlike splinterreekse soos die Chicago-franchise wat met Chicago Fire begin het in 2012, gevolg deur PD in 2014, Med in 2015 en die enkelseisoen Justice in 2017. Chicago PD se toetsepisode was #23 in seisoen 1 van Chicago Fire en hulle is sedertdien besties, sê Fire se hoofuitvoerende vervaardiger, Derek Haas. “Die brandweer het die polisie vir twee minute ontbied, maar ons het besef ons kan langer, dieper stories doen” – soos vanaand se PD-episode.
Dis die tiende keer dat karakters van Chicago Fire en PD saamwerk, maar die verskil die keer is dit is twee episodes wat met een begin (Fire in die geval) en met die ander eindig (PD). Derek sê: “Dis ’n volle storie. Fans raak vies wanneer daar ’n tweetoneel-uitruiling is. Ons het twee uur en twee reekse om die storielyn nou uit te brei.” PD se uitvoerende vervaardiger Rick Eid sê: “Wat ons kort is ’n storielyn om die karakters byeen te bring, soos die polisielid Erin Lindsay (Sophia Bush) en die brandweerman lt. Severide (Taylor Kinney).”
In vanaand se episode van Chicago PD word Severide geïmpliseer in ’n tref-en-trap, maar sy vriende by die intelligensie-eenheid glo hy word vals beskuldig. Die probleem is hulle sal moet optree of die ander sal agterdogtig raak en dis deel van die plan, sê Rick. “Vir deel 1 (Chicago Fire seisoen 5 episode 9) het ons gefokus op die brandweermanne en ons het deel 2 klaargemaak met die speurders. Ons het die wonderlike kans om jul gunstelingkarakters met mense van ander wêrelde te laat praat. Dis nie maklik nie – maande se beplanning is nodig. Maar ons baas Dick Wolf sê dikwels: ‘Oorkruisepisode! Nou!’ En dan moet ons wondere verrig.”