The Affair
Seisoen 4 M-Net (*101) 22:00 Drama
Die romanskrywer en rokjagter Noah Solloway (Dominic West) se flirtasie met die Franse letterkunde en Franse letterkundeprofessore is verby in The Affair (2014-nou). Hy is op pad na die tawwe LA-buurt Compton om ’n inspirerende hoërskoolonderwyser te word, nes ’n mens altyd in flieks sien. Die leerlinge word egter nie deur hul nuwe onnie en die letterkunde besiel nie – behalwe vir ’n paar meisies wat hom as ’n seksobjek beskou. Wel, dis hoe dit vir Noah lyk. In sy oë was elke vrou wat ons tot dusver in die reeks ontmoet het aangetrokke tot hom. En nou maak sy nuwe baas, die skoolhoof Janelle Wilson (Sanaa Lathan), ogies vir hom . . .
Vir Noah is dit nog ’n uitnodiging tot romanse wanneer hy sy eie wellustige begeertes op die vroue rondom hom projekteer. Ongelukkig vir die casanova lyk dit of die skone geslag gou oor hom is – en dan wys die naels. Sy eksvrou Helen (Maura Tierney) sê vir hom in die seisoen-première: “Ek het uiteindelik ’n nuwe lewe. Die enigste probleem is jy is nog daarin.”
Dit lyk of net ’n klein klemverskuiwing nodig is om Noah maklik te kan weerstaan. “Hy moet grootword, van ’n man-kind tot ’n man. Maar ’n jakkals laat nie maklik sy streke staan nie, en ek dink nie Noah gaan sommer die seisoen verander in ’n man wat insig kry nie,” sê die reeksskepper, Sarah Treem. “Wat ons probeer doen, is om doelbewus wrywing te skep tussen sy wêreldbeskouing en hoe ander mense sake sien. Ek dink nie hy is inherent boos nie, maar hy het slegte en kwetsende keuses gemaak. En dit spruit uit sy eie onsekerhede en sy verwagtinge wat nie altyd strook met die ware toedrag van sake nie,” voeg Sarah by.