American Beauty Star
Seisoen 1 Lifetime (*131) 20:55 Realiteit
Glans bereik ’n nuwe hoogtepunt in die realiteitskompetisie American Beauty Star (2017-nou) wanneer twaalf haarstiliste en grimeerkunstenaars meeding om treffende voorkomste vir die rooi tapyt te skep in ’n reeks uitdagings. Dis blosser, vals wimpers, haarsproei en aandrokke net waar jy kyk terwyl die deelnemers hul model optof vir die loopplank, en wil bewys hulle is nie net ’n Instagram-eendagwonder nie.
Die reeks se uitvoerende vervaardiger, die supermodel Adriana Lima, is ook die aanbieder en een van die beoordelaars. Sy het gekyk na Heidi Klum, een van Project Runway (2004-nou) se beoordelaars, en Tyra Banks, die skepper en aanbieder van America’s Next Top Model (2003-nou), vir wenke oor hoe om stylvol streng te wees!
Die deelnemers se mentor is die man wat
Beyoncé soos ’n goue godin laat lyk, Sir John, en hy soek iets oorspronkliks. “Almal is begaan oor grimering wat die gesig aksentueer, oor kitssonbruin. Almal is obsessief met een idee van wat skoonheid is. Hoekom volg ons dieselfde drie mense? Dit behoort meer uiteenlopend te wees,” reken hy.
Die ander twee beoordelaars is die skoonheidsredakteur van Vogue, Sarah Brown, wat sê: “Ons sal die deelnemers nie sommer afkraak nie. Hulle kry raad van mense wat weet waarvan hulle praat.” En die fotograaf Russell James waarsku: “As iemand agter ’n sosialemedia-teenwoordigheid skuil, maar nie regtig die talent het nie, kan ons hulle nie daarmee laat wegkom nie.”