Goeie nuus
Mrs. J is verheug wanneer Ronald na Ruiterbosch terugkeer.
Suidooster Weekdae kykNET (*144) 18:30
As daar nou een Ruiterbosch-inwoner is wie se liefdeslewe heelwat gesonder is as Chris s’n (lees meer op bl. 15), is dit Mrs. J ( Theresa Sedras). Sedert einde Maart vanjaar vry sy en haar kêrel, pastoor Ronald (Ivan Abrahams), wat in Port Elizabeth woon, so oor ’n afstand. Sy mis hom vreeslik en is op Maandag 17 September in die wolke wanneer hy onverwags opdaag – en hy is hier om te bly! Maar die een bakleiery ná die ander laat haar wonder of hulle vir mekaar beskore is.
DIE GOUE JARE
Mrs. J is oorstelp wanneer Ronald haar vertel hy het van sy kudde in Port Elizabeth afskeid geneem en kom in Ruiterbosch aftree. “Hy het almal verras, selfs sy kleinseun
Siya (Gantane Kusch), maar dis goeie nuus vir almal in die gemeenskap,” sê Theresa.
Ivan sê Ronald is gereed om sy goue jare saam met Mrs. J deur te bring. “Sy is een van die hoofredes vir sy terugkoms en hy beplan om die res van sy lewe saam met haar te wees.”
Hulle weet om die pap nie te dik aan te maak nie en Ronald trek op Dinsdag 18 September eers by Siya in tot hy sy eie plek kry. “Ronald is dankbaar vir Siya se gasvryheid, maar hy wil van niemand afhanklik wees nie. Hy het darem genoeg vir sy oudag weggesit, so die reëling by Siya sal net tydelik wees,” voeg Ivan by. En die doel is immers om saam met sy geliefde te bly . . .
VRIENDINNE KOER
Mymoena (Jill Levenberg), Mrs. J se beste vriendin, pols haar op Woensdag 19 September oor Ronald se terugkeer. “Mymoena dink dit sê baie van Ronald dat hy in Ruiterbosch kom aftree,” vertel Theresa. “Dit beteken hy sien beslis ’n toekoms vir hulle.”
Mymoena terg Mrs. J goedig oor Ronald se bedoelings, maar die gemoedelike atmosfeer is van korte duur wanneer Ronald Mrs. J se dogter Bridgette (Denise Newman) verkeerd opvryf.
DIE OPMERKING
Mrs. J hou ’n familie- ete op Donderdag 20 September by Bridgette se huis om Ronald amptelik te verwelkom. “Aanvanklik is die aand gesellig, tot ’n opmerking van Ronald Bridgette warm onder die kraag maak. Bridgette hap terug na Ronald en laat hom mooi verstaan haar gesin het nie ’n sedepreek nodig nie,” sê Theresa.
Ons kan nie verklap waaroor die rusie gaan nie, maar Mrs. J wonder of haar nuutgevonde geluk kortstondig gaan wees en of sy tussen Ronald en haar dogter sal moet kies.
KOPPE WORD WEER GESTAMP
Die stof gaan lê op Vrydag 21 September en Bridgette kom tot nuwe insigte. “Sy sluk haar trots en vra Ronald om verskoning vir haar houding by die ete,” vertel Ivan. “Hy vergewe haar, maar sê dan per ongeluk dis hoe hy haar leer ken het – as ’n moeilike vrou – en die twee stamp van voor af koppe.”
MOEILIKHEID VOLG RONALD
Al lyk die situasie onredbaar, sorteer die twee die saak op Maandag 24 September uit. Maar Ronald kan net nie uit die moeilikheid bly nie en beland later die aand in die sop by Mrs. J. “Sy en Ronald moet spring om betyds te wees vir ’n konsert,” vertel Theresa. “Maar hulle is laat weens Ronald se nalatigheid. Hy het vergeet waar hy sy voertuig parkeer het, en dit veroorsaak ’n stryery.”
Hopelik is dit net klein jakkalsies wat die twee kan uitsorteer. Hulle is darem al volwasse en albei verdien geluk!
MRS. J SE LIEFDESWENKE
Wanneer dit by hartsake kom gee Mrs. J altyd die beste raad. Haar liefdeswenke wat sy op Ronald probeer toepas, klink na ’n vyfpuntsuksesresep. As dit net vir hulle ook kan werk! 1. Wees eerlik met mekaar en
moenie doekies omdraai nie. 2. Moenie dat jou familie jou voorsê
oor verhoudings nie. 3. Volg jou hart en nie jou verstand
nie. 4. Doen moeite met mekaar, selfs die kleinste gebaar kan jou geliefde se dag maak. 5. Moet nooit kwaad gaan slaap
nie.