Droomrok-dilemma
Lindiwe moet ’n besluit neem wat meisies haar sal beny wanneer sy twee prag-uitrustings vir haar matriekafskeid het.
Scandal! Weekdae e.tv (*194) 19:30
Dit voel of fans vir ewig gewag het vir Lindiwe (Nomvelo Makhanya) se matriekafskeid, veral omdat die tiener verlede jaar graad 11 herhaal het. “Nou’s dit tyd!” sê die sepie se kostuumontwerper, Corlene Furstenberg. Die groot rokbespreking het al vroeg in 2018 begin, en Scandal! het in Mei ’n aanlyn kompetisie geloods waarin mense Lindiwe se droomuitrusting moes ontwerp. Die wenner, Refentse Murwa, is toe betrek om middel Julie een van Lindiwe se twee rokke te help maak. Lindiwe kry nie net die date van haar drome nie – ons ontmoet hom op Vrydag 14 September – maar danksy haar nuwe vryer ook haar droomrok (Refentse se ontwerp). Intussen het tant
Phindile (Pretty Ncayiyana) liefdevol gewerk aan elke steek van die rok (die span se ontwerp) wat Lindiwe op Maandag 17 September aanpas.
OM LYF TE WYS OF NIE
Corlene se klerespan het Refentse se ontwerp behou, maar een belangrike verandering aangebring. “Dit verskil van die oorspronklike ontwerp bloot omdat Lindiwe se pa, Mlungisi (Patrick Mofokeng), so geskok is en dit word ’n belangrike deel van die storielyn. Dit was Refentse se ontwerp, ek het net nie oral satyn gebruik nie, maar iets meer deurskynend. Ek wou sien wat meisies van daardie ouderdom asemrowend vind, en ek het ook gekyk na wat ons plaaslike celebs dra en hulle wys baie lyf. Dis waar die idee van ’n deurskynende rok vandaan kom. Daarby is Lindiwe mos ’n waaghalsige meisiekind.”
TYD OM TE SKITTER
Hoewel geld ’n kwessie vir Lindiwe se familie is, het Corlene en haar span geen moeite ontsien nie. “Ek het op ander dinge in die begroting gesny, want ek wou dit reg doen. Dis nou Lindiwe se tyd om te skitter. Gelukkig het ek nie baie materiaal nodig gehad nie omdat Nomvelo so klein en fyn is,” skerts Corlene. “Die rooi rok se materiaal kos sowat R550 per meter, en ons begroting was rondom R4 000. Dis bra duur vir een uitrusting, maar ook lekker om mense hoop te gee dat goeie dinge moontlik is en daar ’n feeprinsesrok vir almal is.” En kyk op Woensdag 19 September watter rok Lindiwe kies!