Drie uitgangspunte
Die nuwe ontwerppare staan reg om ons te wys hoe om ’n nuwe dop in ’n droomhuis te verander in Win A Home.
Seisoen 5 Donderdae SABC3 (*193) 19:30 (begin 20 September)
Die ontwerprealiteitsreeks Win A Home (2014-nou) begin seisoen 5 deur in hul eie nuwe plekkie in te trek in die 19:30-tydgleuf. Die seisoen se ontwerppare wat hul flair na die leë woonstel by die Paardevlei-leefstyllandgoed in Somerset-Wes bring is: Nicholas Smit en Kehumile Mate, Sinéad Turner en Melissa Oosthuizen, en Rekopile Belebesi en Koketso Marole.
Hulle sal week ná week meeding om die beste ontwerpe en meubels vir elke vertrek in die identiese woonstelle saam te stel vir hul onbekende kliënt. Elke episode se werk word deur ’n ander professionele binneontwerper beoordeel. Ons het die drie spanne gevra om te verklap hoe hulle hul droomwoonstel sal inrig.
Hoe het julle ’n ontwerppaar geword?
“Op my eerste dag by die ontwerpskool in Woodstock, Kaapstad, het Nicholas se baadjie wat hy aangehad het my oog gevang. Net toe ek hom daaroor wou komplimenteer, het hy gesê hy hou van my trui,” sê Kehumile. Melissa sê sy en Sinéad “het op hul eerste dag by ’n restaurant oorkant die kollege Greenside Design Centre [Joburg] ontmoet. Sy het by my tafel kom sit en ons het gegiggel omdat ek gedink het sy was ’n tweedejaar, al was ons in dieselfde klas.” En Rekopile en Koketso onthul: “Ons het drie maande voor die Win A Home-kompetisie by die Design Joburg 2018-uitstalling ontmoet. Ons het halfpad deur ’n gesprek gekliek toe ons besef ons wil gehaltevervaardiging bevorder en goeie produkte lewer, selfs ons eie materiale.”
Hoe stel julle jou Win A Home-kliënt voor?
Koketso en Rekopile stem saam hul kliënt is “’n waaghalsige, kreatiewe jong mens wat besiel word deur internasionale estetika, maar hulle [die ontwerpers] neig meer na Afrika- en doelgemaakte stukke.” Rekopile voeg by: “Ek sou nie so baie patrone soos hierdie kliënt inspan nie; ek sou meer geometriese vorms gebruik. Hoe morsiger hoe beter!” En Koketso sê: “Hulle verkies lae in hul ruimte, maar ek is meer begaan oor funksionaliteit.”
Volgens Kehumile is “ons kliënte ’n jong, skeppende paar wat vir hul nuwe plek gespaar het. My pan-Afrika- estetika sal getemper moet word vir die paar, want nie almal wil so ’n oorheersende estetika hê nie.” Melissa beskou hul kliënte as “’n jong, dinamiese paar wat graag kook en onthaal”, en Sinéad erken: “Ek sou waarskynlik die ruimte meer kleur gee. Baie reënboë.”
Wat’s die eerste ding wat julle wou verander of beklemtoon toe julle die woonstel sien?
“Ons kon nie wag om persoonlikheid by te voeg en die dekor asook atmosfeer van die interieur te verander nie,” sê Koketso en Rekopile. Nicholas verduidelik sy en Kehumile se uitleg van die eenheid is “die TV-punt het in die middag baie son gekry, dus moes ons vinnig optree voor ander aspekte voorrang kry”. Sinéad onthul sy en Melissa “wou die lieflike hoë plafonne en die wonderlike uitsig beklemtoon”.
ONTWERPMOENIES Watter dekor-trend raak nou afgesaag?
“Duikwegtipe teëls het hul plek gehad, maar daar is soveel interessante maniere waarop teëls gelê kan word,” sê Nicholas. Kehumile voeg by: “Ek verpes die ontblote-baksteenmuurpapier wat so gewild was in restaurante.” Rekopile hou nie van bypassende dekor nie, en skree: “So oudmodies!” Vir Koketso beteken dit “om ’n bed te hê met twee bedtafeltjies aan weerskante met twee bypassende lampe”. En paisley maak Melissa moeg.
En wat ontstel julle wanneer julle dit in nuwe geboue sien?
“Die gebrek aan groenigheid by ’n nuwe ontwikkeling laat my ongemaklik voel,” sê Kehumile. Nicholas vind sleg uitgedinkte benutting van ’n ruimte as “werklik ontstellend, veral waar spasie beperk is”. Koketso se nagmerrie is “onnodige hoeke, want dis byna onmoontlik om daarom te ontwerp”. En Rekopile wil groot vensters hê! “Wanneer daar te min vensters is sal dit bedags ook soos aand lyk, wat vervelige ruimtes sal skep.” Vir Melissa is dit nie soseer die ruimte nie as hoeveel goed ons in die spasies prop. “Minimalisme is beslis ’n moet-beweging,” sê sy.