Musiek-extravaganza
’n Nuwe musiekreeks op gratis TV is vol vermaak en nostalgie.
In Die Kollig Met . . . Seisoen 1 Sondae SABC2 (*192) 17:00
Wat is lekkerder as om in jou sitkamer na ’n konsert uit die boonste rakke te kyk? Die bekende aanbieder en uitvoerende vervaardiger Johan Stemmet se nuwe musiekreeks In Die Kollig Met . . . is iets wat die hele gesin saam sal geniet. “Ek het die laaste paar jaar hoofsaaklik musiekspeletjiesreekse soos Noot Vir Noot (1991-nou) en Musiek Roulette (2014-nou) vervaardig. Ek wou vir ’n verandering weer ’n reeks met slegs musiek maak, soos die programme wat ek in die 1980’s vervaardig het,” vertel Johan. En kykers weet al uit dié veteraan se stal kan hulle top-kykgenot verwag.
GEWILDE EN NUWE STEMME
Johan vertel dit was ’n enorme taak om 39 kunstenaars uit ’n verskeidenheid genres vir die reeks van 13 episodes te kies. “Ons het hoofsaaklik gefokus op die bekende en gewilde stemme in die Afrikaanse musiekbedryf, soos Corlea (episode 1), met wie ons die laaste paar jaar saamgewerk het. Maar daar’s ook heelwat nuwe talent.”
Jan Publiek het ook ’n sê gehad: hulle kon op die Noot-Vir-Noot-blad sowel as op Johan se persoonlike Facebook-blad hul gunsteling-sangers kies. En die kunstenaars op die lys gaan in ’n wye gehoor se smaak val: van gunstelinge soos André Schwartz (episode 5), Elvis Blue (episode 2), Danie
Niehaus (episode 8) tot nuwe stemme soos Faraway
George (episode 2).
VOOR GEHOOR OPGENEEM
Die reeks het ’n moderne aanslag. In Die Kollig Met . . . is in Julie vanjaar by die nuwe en ultra-moderne Urban Brew-alteljees in Randburg voor ’n gehoor opgeneem. “Ons het ook die nuutste beligtingseffekte gebruik,” vertel Johan trots. Die sangers word begelei deur ’n orkes van elf lede wat strykers insluit, en die orkes staan onder leiding van die knap musiekregisseur Jaconell Mouton. Jaconell is sedert 2003 lid van Noot Vir Noot se Musiekfabriek en het die leisels in 2012 by Johan van Rensburg oorgeneem. “Die orkes sluit van ons beste musikante in, soos die kitaarspelers Mauritz Lotz en Denny Lalouette sowel as die tromspeler David Klassen,” vertel Johan.
Hy voeg by met die nuwe program word gepoog om kykers te laat voel of hulle by ’n regstreekse konsert is. “Ek hoop die verskeidenheid musiek en die vermaaklikheidswaarde van elke kunstenaar sal dit ’n besonderse kykervaring vir oud en jonk maak.”
DIE FORMAAT
Elke episode het drie sangers: ’n hoofkunstenaar, ’n gaskunstenaar sowel as ’n goue grote, met ander woorde ’n meer gevestigde sanger soos Lance James (episode 4, 23 September). “Ons volg die voetspore van die hoofkunstenaar van sy grootwordjare tot nou. Die hoofkunstenaar is ook die aanbieder van elke episode en hy of sy kies self ’n gaskunstenaar en hulle sing ’n duet saam,” verduidelik Johan. Daar word aan die einde van elke episode hulde gebring aan ’n ontslape kunstenaar, soos Johannes Kerkorrel (episode 3, 16 September).