NCIS: Los Angeles
Seisoen 1 e.tv (*194) 20:30 Aksie Om ’n splinterreeks van ’n bekende reeks te maak is nie so maklik nie, sê die uitvoerende vervaardiger Shane Brennan, die man wat NCIS: Los Angeles (2009-nou) geskep het. “Daar is soveel wat oorweeg moet word. Ek het aan die oorspronklike NCIS-reeks (2003nou) gewerk en netwerkgoedkeuring vir ’n splinterreeks is besonder moeilik.” Shane noem vyf punte wat ’n mens in gedagte moet hou met splinterreekse:
1 Storielyne “Kan jy ’n heeltemal afsonderlike storie skep wat net so boeiend sal wees? Ons was gelukkig met NCIS en NCIS: LA, want ons was in teenoorgestelde dele van die land. Dit beteken verskillende wêrelde wat met ’n werktema verbind kan word,” sê Shane.
2 Karakters Kykers bou ’n verhouding met karakters “en hulle sal dalk nie die skip wil verlaat ter wille van nuwe gesigte nie”. Shane voeg by reekse moet versigtig wees vir voorstories, want “daar’s net soveel plek in die TV-wêreld vir die ‘eks-spesialemagte soldaat wat die span lei’”.
3 Akteurs Wie’s beskikbaar, wie kan die reeks voortdryf, wie’s geloofwaardig in die rol? “Dis moeilik om ’n nuweling te vat en die gewig van die reeks op sy skouers te sit,” verduidelik Shane. “Ons was gelukkig met NCIS: LA. Ons het LL Cool J en Chris O’Donnell gekry vir die rolle van die tawwe Sam Hanna en spesiale agent G. Callen.”
4 Kykerontvangs Reekse gebruik spesiale mense om te toets hoe ’n gehoor op ’n splinterreeks reageer. “Jy moet dalk ’n episode in jou huidige reeks herskryf en dit kan die hele seisoen verander,” waarsku Shane.
5 Tydgleuf Netwerke beplan hul roosters maande voor die tyd. “Jy moet hulle ’n uitstekende rede gee om jou ’n tydgleuf te bied wat deur ’n ander projek gevul kon word,” sê Shane.