Botsende belange
Mokgadi stuit haar skoonouers se wraakplanne ná ’n tref-entrap-ongeluk met Charles waarin sy lig beseer is.
Mokgadi (Pebetsi Matlaila) het glad nie verwag sy sou met Charles (Masilo Magoro) in ’n motorongeluk betrokke wees nie. Maar dis hy wat homself op Woensdag 26 September aan die polisie oorgee vir die tref- entrap-ongeluk die vorige dag. “Mokgadi is bly sy is nie dood nie. Sy wil hom nie aankla nie,” verduidelik Pebetsi. In 2014 het Mokgadi se swaer
Tbose (Cornet Mamabolo) skotvry daarvan afgekom vir die botsing waarin Charles se broer dood is, dus meen sy dis regverdig dat Charles vry is, voeg die aktrise by. Mokgadi se skoonmense John en Meikie (Africa Tsoai en Harriet Manamela) stem nie saam nie en eis dat sy ’n saak aanhangig maak. Sy het nog altyd soos ’n buitestander gevoel en hoewel dit haar in hul goeie boeke sal laat beland, weier Mokgadi. Nou wil die ondersoekende joernalis weet waarom haar skoonmense so gretig is om Charles aan die pen te laat ry.
SPOKE UIT DIE VERLEDE
Mokgadi was nie in 2014 deel van die Maputla-familie nie. Sy weet dus net dit wat sy van die noodlottige ongeluk gehoor het. “Die Maputlas kruis sedertdien swaarde met Charles, want hulle meen hy was te hard teenoor Tbose, wat destyds ’n tiener was. Hulle meen Charles kyk van toe af op hulle neer en nou het hulle die voordeel bo hom,” sê Pebetsi. “Hulle probeer haar by hul vete insleep, maar Mokgadi kies nie haar familie se kant nie.”
DIE WAARHEID MAAK SEER
Terwyl John en Meikie steeds woedend is oor Mokgadi se astrantheid, red sy hulle egter van ’n verleentheid op Vrydag 28 September. Charles se assistent by sy spaza, Alfios (Tebogo Modisane), bieg hy het in Mokgadi vasgery en Charles het hom beskerm, want Alfios het nie ’n rybewys nie, onthul Pebetsi. “Haar prokureurman Leeto (Eric Macheru) het reeds ’n vergadering met die Padongelukkefonds belê [op Donderdag 4 Oktober], maar Mokgadi weier om te eis.” Iets is nie reg nie, sê die aktrise, want skielik dring John en Meikie nie meer daarop aan hul skoondogter moet ’n klag lê nie. Mokgadi raak agterdogtig op Vrydag 5 Oktober wanneer Meikie vra sy moenie ondersoek instel na Tbose se botsing en sy verlede met Charles nie . . .