Geld wat stom is
Clive maak ’n aanbod vir The Deep se bordeelbaas Nina.
Clive ken drama en dit het hy saamgebring na Horizon Deep, verduidelik Stefan Ludik, wie se karakter so twyfelagtig is as wat kan kom. “Dit is die klassieke Clive. Hy raak betrokke by plaaslike ondernemings deur agteraf te konkel en hy gebruik hul geld en dikwels hul persele vir geldwassery en steek die wins in sy sak,” sê die akteur. En hoewel hy en sy medepligtige vrou, Seline (Rosa Anthony), reeds talle kere so gekonkel het, is hulle die keer by die verkeerde adres wanneer Clive ’n nuwe geleentheid op Donderdag 27 September sien. “Clive gaan na Nina en sê hy wil ’n deel hê van die wins uit haar prostitusienetwerk wat sy by die Bokamoso-hotel bedryf,” onthul Stefan. “Hy kan haar aan die kaak stel en haar bedryf stopsit, maar nóg belangriker, hy het toegang tot geld van die hotel wat hy verduister het wat sy vir haar ander onderduimse bedrywighede kan gebruik.”
DIE DUIWEL SELF
Clive het sy eerste vyf maande op die dorp gebruik om uit te vind wie is wie en die spil van alles is die skelm Nina. “Maar hy is ’n sosiopaat en self ’n skelm, hy word dus nie van stryk gebring om sake te doen met so ’n gewetenlose mens soos Nina nie,” sê Stefan en grynslag. Hulle sê daar is altyd ’n groter vis en op Maandag 1 Oktober begin sy na Clive hap wanneer die krake in sy gekonkel wys. “Nina het hom nie sommer net ’n aandeel in die besigheid gegee nie,” sê Stefan. “Nina is slimmer as wat Clive dink en sy sien die groter prentjie, hy gaan ’n fout maak. Sy vat sy geld, want sy weet hy is een van die dae haar eiendom!”
MY VROU OF MY GELD?
Clive se ander probleem is Seline het geen idee van sy nuwe skelmstreek nie nadat sy hom laat belowe het hy gaan nie meer agteraf konkel nie. “Hulle het na Horizon Deep gekom toe hulle die laaste keer uitgevang is. Hul slagoffer het hulle nie aangekla nie, maar hulle moes uit die dorp padgee. Clive het belowe sy geknoei was iets van die verlede en hulle kon oor begin,” verduidelik Stefan. “Dit is die seksbedryf die. Hulle het ’n oop verhouding, maar Clive daal tot ’n nuwe laagtepunt.” Die kwessie is nou wat kan hy nie bekostig om te verloor nie: sy vrou of sy geld op Maandag 8 Oktober.