Die Guru is terug
Hannon staan reg met sy haarborsel, skêr en grimeerkwas.
Glam Guru Seisoen 15 Sondae kykNET (*144) 17:30 (begin 7 Oktober)
2018 is ’n besonderse jaar vir die sakeman, stilis, grimeerkunstenaar en skoonheidsghoeroe Hannon Bothma. Dis die tiende verjaardag van sy transformasiereeks Glam Guru (2008-nou) en hy het in Julie ’n halfeeu oud geword. “Ek kan nie glo ons is steeds so bevoorreg om mense se lewe met ons minimale mooimaakwenke en transformasies te verander nie,” sê Hannon.
In die nuwe seisoen word 12 aspoestertjies weer in prinsesse omtower. Daar is ook ’n bonus-episode 13 wat al die hoogtepunte van die reeks gaan wys.
HARE, MODE EN ROME
Vir die nuwe seisoen het Hannon en sy span besluit om die haarstileringsegment in die episodes te verleng. “Nou kan kykers stap vir stap sien hoe ek en ander stiliste ’n deelnemer se hare verander, en kan hulle dit self by die huis doen,” vertel Hannon. ’n Dagboeksegment waar Hannon aan die einde van elke episode alleen en regstreeks met die kamera praat, is ook bygevoeg. “Dit sorg vir ekstra pret, want ek sê ’n paar stoute goed.”
Buiten vir die mode- en-kleretransformasie wat die deelnemers kry, word nuwe velrome van Hannon se eie velsorgreeks en kosmetiese produkte ingespan. “Ons gaan ’n nuwe gesigmasker, naelpolitoer en serum op ons deelnemers gebruik, asook ’n chemiese afskilferingstegniek wat dien as ’n soort botoks-inspuiting sonder enige naalde.”
’N TEMA VIR ELKE VROU
Hannon het moeite gedoen om deelnemers oor die land heen te kry. “Met elke deelnemer is daar ’n gepaardgaande tema. So is daar ’n vrou wat onlangs afgetree het en wat haar voorkoms wil opkikker in episode 2 (14 Oktober), ’n bruidstema waar iemand vir die tweede keer trou en dit stylvol wil aanpak in episode 7 (18 November), en ’n swanger vrou wat met haar boepie wil skitter in episode 11 (16 Desember).”
Buiten die deelnemers wat oormaaksessies kry, word Glam Guru se stel ook gereeld omgetower. Vir die nuwe seisoen word die bestaande stel egter gebruik. “Die baksteenmure is terug met ons moderne kubiese versierings, maar my vingers jeuk om die stel weer oor te doen. Hopelik kan dit vir die volgende seisoen realiseer,” vertel Hannon.
DIE BEGINDAE
Hannon kyk met heimwee terug op 2008 toe hy gevra is om die nuwe program Glam Guru aan te bied. “Ek het nie die vaagste benul gehad wat ek moes doen nie,” erken hy. “Daar was geen teks nie en ek moes vinnig op my voete dink wat ek gaan sê voor die kameras begin rol het.”
Nou is Hannon al ervare en ook agter die skerms betrokke en skryf self sy draaiboeke. “Ek is mal daaroor om kreatief te wees, en om te skryf is deel daarvan.”
Humor is vir hom ’n belangrike aspek in die reeks. “Dit moet nooit styf en preuts oorkom nie. Dus maak ek altyd seker ek sê iets skerps of maak ’n onskuldige grappie wanneer ek met die deelnemers praat,” sê Hannon.