The Sinner
Seisoen 2 M-Net (*101) 21:00 Drama
Met die veroordeelde moordenaar Cora (Jessica Biel) agter tralies in seisoen 1 se slotepisode, het speurder Harry Ambrose (Bill Pullman) iets nodig om hom besig te hou in die rillerreeks The Sinner (2017-nou). Iets soos ’n dubbele moord om te ontsluit wat dit ook al is wat in seisoen 1 aan hom gevreet het. “Ons het dit nooit uitgeklaar nie,” verduidelik Bill. “Ons het baie daaroor gepraat, maar nou kry ons duidelikheid en dit gaan terug na Harry se kinderjare en dat hy in pleegsorg was; hoe hy daar beland het. Dis traumaties.”
So traumaties soos ’n messwaaiende Cora wat onskuldige mans opsny? “Harry praat nie baie oor sy jeug nie en dis waar sy probleme begin het,” onthul Jessica, wat die seisoen nie voor die kamera is nie, maar haar rol as uitvoerende vervaardiger voortsit. En moenie dink die seisoen gaan die aksie versag nie, want seisoen 1 was gegrond op ’n bestaande boek deur Petra Hammesfahr. Sy het by die produksiespan aangesluit om die draaiboek vir die reeks te skryf. “Ons sou glad nie ’n tweede seisoen kon doen sonder Petra se aandeel en dat sy ons lei nie,” voeg Jessica by.
Hoeveel geheimsinniger en grieseliger kon The Sinner raak as dat Cora in ’n gebreinspoelde moordenaar verander het? Die tiener in die middel van die moorde is die 13-jarige Julian (Elisha Henig) wat sy ouers op ’n padreis vergiftig. “Maar hoe meer Harry grawe, hoe meer merk hy dinge is nie soos dit lyk nie,” sê Bill. “Julian het geen bagasie nie. Hy wil nie sê hoekom hy sy ouers vermoor het nie. Is hulle ooit sy ouers? Miskien het Harry en Julian iets gemeen wat my karakter nog nie besef nie,” voeg Bill by.