Vet Kans
Seisoen 1 kykNET (*144) 18:00 Leefstyl
Die nuwe leefstylreeks Vet Kans (2018nou) gaan “op ’n unieke manier na die reis van gewigsverlies kyk”, sê die mediapersoonlikheid en vervaardiger Rian van Heerden. “Ons gaan fokus op die fisieke, maar ook die geestelike aspekte van gewigsverlies en om ’n gesonde leefstyl aan te kweek.” Ses deelnemers se lewe verander handomkeer in die 13 episodes. En in episode 2 (11 Oktober) maak die reeksaanbieder, die aktrise Karin van der Laag (47), ’n groot aankondiging oor haar eie gewigsverliesreis. Karin vertel meer.
Ons sien jou die eerste keer as aanbieder ná jou rolle as Hettie in 7de Laan (2000-nou) in 2017 en die sielkundige dr. Jameson in Scandal! (2005-nou) in 2018. Verskil dit baie van toneelspeel? Ek het dit aanvanklik uitdagend gevind, want ek kon nie net in ’n karakter se skoene klim en ’n persona aanneem nie. Boonop is Afrikaans my tweede taal, dus moes ek hard werk om nie te veel Engelse woorde te laat inglip nie.
Die deelnemers in die reeks gaan die MediLean-dieet volg. Wat behels dit? Dis ’n medies gekonsentreerde dieet wat ’n laekalorie-eetprogram en hormoonbehandelings, wat onnodige vetselle verwyder, insluit. MediLean het ook dieetkundiges en lewensafrigters vir elke deelnemer beskikbaar gestel wat hulle help en ondersteun.
Wat is jou boodskap aan mense wat probleme met hul gesondheid en gewig het? As ’n vrou wat al jare lank met my gewig worstel, wil ek aan mense in dieselfde situasie sê: Jy is die een wat die besluit vir jouself moet neem om gewig te verloor. Moet dit nie om iemand anders se onthalwe probeer doen nie, want dan gaan jy nie beheer daaroor kry nie. Wees lief vir jouself en besluit om gesonder te wees sodat jy langer kan leef.