The Mindy Project

Seisoen 1 SABC3 (*193) 19:30 Komedie

Ed Weeks is die ginekoloog dr. Reed in die mediese komedie The Mindy Project (2012-2017). Maar dit het amper nie gebeur nie, sê die akteur. “Eers wou hulle hê hy moes met ’n Amerikaanse aksent praat. Natuurlik kon ek nie, want ek is van Brittanje. Ek kon ook nie die aksent goed namaak nie. Maar ná my oudisie het die vervaardigers van plan verander. Dit pas by Reed om so preuts te wees.”

1 Ed se Suid-Amerikaanse voorkoms is te danke aan sy ma – sy is van El Salvador – maar hy is ’n Brit in murg en been . . . sy volle name is Edward Charles Egerton Weeks.

2 Terwyl hy op kosskool by Queens College en Trinity College was, het hy begin toneelspeel. Ed was ook die president van die amateurteatergroep The Footlights aan die Cambridge-universiteit voor hy in die vroeë 2000’s sy graad in die skone kunste verwerf het.

3 Ed wou altyd in die TV-bedryf werk, maar as ’n skrywer, en sê “ek het jare lank studeer en gedink ek moet dié kennis laat werk. Maar ek was heeltemal verkeerd!” Sy eerste skryfopdrag was vir die Britse komediereeks Man Stroke Woman (2005-2007).

4 In 2011 het hy na Los Angeles verhuis en by die poetsbakprogram Dirty Sexy Funny (2010-2011) aangesluit. En hoewel hy van die weer hou, mis Ed iets van sy land: “Om wakker te word en ’n sjokoladetruffel in die kombuis te kry en in my mond te stop. Die sjokolade hier is nie soos ek sjokolade ken nie.”

5 En hoewel Ed beweer hy is skaam, het hy in 2016 op die glansrykste aand in die vermaakbedryf sy meisie bekendgestel toe hy met Bellamy Young (Mellie Grant in die politieke riller The Fixer, 2012-2018) aan sy sy by die Oscars opgedaag het.