Kyk Of Koop?
In die nuwe realiteitsreeks Kyk Of Koop? ding twee ervare eiendomsagente, Meyer Swanepoel en Margot van Wyk, mee om te sien wie die verkoopbordjie voor ’n huis kan hang. Daar is nie pryse op die spel nie, maar daar is wel ’n kompetisie-element: In ’n paar van die 13 episodes word die verloorder gestraf. Dit kan behels om in ’n eina-swembroekie in ’n yskoue dam te swem, of in ’n tutu op die strand te gaan stap. Amor Engelbrecht, die vervaardiger, vertel meer.
Hoe lyk die basiese konsep van elke episode? Margot en Meyer kry die volgende inligting by dieselfde moontlike koper: die begroting, hoekom hy of sy na ’n nuwe plek soek, en vyf kriteria vir die persoon se droom-eiendom. Daarna kuier Margot en Meyer afsonderlik by die kliënt vir meer inligting om die persoon se droomhuis te help opspoor. Albei kies ’n huis om vir die kliënt te wys. As dit nie in die deelnemer se smaak val nie, kry hulle ’n tweede kans om ’n huis te wys. Die voornemende koper besluit of een van die huise sy of haar hart gewen het, en die kooptransaksie word beklink met Meyer of Margot wat as wenagent gekroon word. Die een wie se huis nie gekies word nie, kry in sommige episodes ’n snaakse straf. Hoe het die idee van ’n realiteitsreeks oor eiendomsagente ontstaan? Daar is talle internasionale reekse met die tema van eiendomme, soos House Hunters (1999-nou) en Location Location Location (2000-nou), maar met ’n meer dokumentêre aanslag. Ek wou ’n realiteitsreeks maak wat pret en vermaaklik is. Kykers sal ook meer uitvind oor die eiendomsmark in die Wes-Kaap, waar ons verfilm. Hoe het julle potensiële kopers opgespoor?
Deur die plaaslike eiendomsagente.