Dodelike strik
Nina kry The Deep se nuwe sangoma Dlangamandla om van ’n gees in haar sjebien ontslae te raak.
Die verlede het ’n snaakse manier om met die hede in te meng vir die misdaadkoningin Nina (Khabonina Qubeka), wat gedink het haar probleme is op ’n end toe sy die polisie-informant Hector (Shepherd Sibisi) in 2016 vermoor het. Maar sy hardloop soos ’n afkophoender rond op Woensdag 24 Oktober ná haar sangoma Gatanga (Amos Ketlele) die vorige dag vir haar gesê het daar is ’n gees in haar sjebien. “Nina is vreesbevange,” vertel Khabonina. “Sy het Hector in haar sjebien begrawe, dus is sy teenwoordigheid nog daar.” Nina se probleem is hoe sy van Hector se gees ontslae gaan raak en ook haar kliënte behou, en Gatanga sê op Donderdag 25 Oktober vir haar sy sal moet bieg om die gees tot rus te bring. “Dis glad nie ’n opsie nie! Nina sal eerder ’n ander sangoma kry om die gees te hanteer as om haarself oor te gee,” sê die aktrise. Maar al is Nina hoe wreed, is sy voorbereid op die gevolge as sy toordery betrek?
BLINDELINGSE VERTROUE
In haar desperaatheid kry Nina op Vrydag 26 Oktober die twyfelagtige sangoma Dlangamandla (Keneilwe Matizze) om Gatanga se taak oor te neem. “Die vraag is: Raak Dlangamandla regtig van die gees ontslae of lei sy Nina om die bos? Die nuwe sangoma is bedrieglik, sy’s geldhonger en gebruik haar magte vir bose dade,” verklap Khabonina. In hierdie stadium gee Nina nie om hoe Hector verwyder word nie, al wat saak maak is dat hy moet weggaan. “Nina blameer Hector vir die vete met haar sakevyand Lincoln (Lindani Nkosi),” verklap Khabonina. “Ons sien Nina is besig om te knak [op Maandag 29 Oktober]. Selfs ná Dlangamandla haar toorwerk doen, word Nina se teenspoed net erger.”
MOEILIKHEID EN MOETIE
Omdat Nina dink sy het sterker magte nodig om haar te red, wend sy haar op Maandag 29 Oktober weer tot Dlangamandla en vra haar om ’n vloek uit te spreek oor Lincoln, wat gedreig het om Nina vir goed te vernietig. “Sy raak ál meer by die toorkuns betrokke. Maar Nina glo Lincoln het dit oor homself gebring,” sê Khabonina. Nina het Lincoln vroeër in Oktober om verskoning gevra omdat sy sy familie in 2017 uitmekaargeskeur het, maar hy’t haar nou in ’n hoek gedryf. Sy sal enigiets teen hom gebruik, soos moetie wat hom op Woensdag 31 Oktober met ’n geheimsinnige siekte in die hospitaal laat beland. “Maar Lincoln word ’n paar dae later ontslaan, wat Nina bekommerd maak,” sê Khabonina. “As die moetie nie gewerk het nie, is Hector se gees ooit regtig weg?”