Driedubbele pret en ongewone ervarings
Pasella is terug met ’n nuwe seisoen en drie nuwe aanbieders.
Pasella Seisoen 27 Woensdae SABC2 (*192) 19:30
Dis die seisoen van drietalle vir die immergewilde leefstylreeks Pasella (1998-nou). Elke episode bestaan uit ’n driedubbele dosis van unieke ervarings, bestemmings en aktiwiteite wat kykers nie moet misloop nie. Boonop sluit drie nuwe gesigte by die aanbiederspan aan: die aktrise Amalia Uys, die sangsensasie Sasha-Lee Davids, en die rymkletser Rumacques Gelderbloem.
GROENTJIES VIND HUL VOETE
Amalia (34), wat in 2006 bekend geword het as San-Mari van Graan (20062013) in die sepie 7de Laan (2000-nou), sê sy is nog ’n groentjie wat aanbieding betref. “My enigste ervaring was toe ek in 2013 ’n gasaanbieder in die leefstylreeks Mooiloop! (2013-2017) was. Maar soos die tyd aanloop en ek ál meer Pasella- episodes verfilm, begin die werk my soos ’n handskoen pas,” voeg sy by.
Pasella is ook Rumacques (32) en Sasha-Lee (28) se vuurdoop met aanbieding. Rumacques, wat oorspronklik van Worcester in die Wes-Kaap kom, was al as radio-omroeper by RSG en Vallei 88.8-93.7 FM betrokke. Hy is ook ’n mentor by die jaarlikse ATKV- Crescendo-liedjieskryfskool. Rumacques sê as dit nie vir die Pasella-produksiespan was wat hom tydens die verfilming help en ondersteun nie, sou hy lankal die hasepad gekies het. “Ek sien wel daarna uit om deur die tannies op straat raakgesien te word ná hulle my op die kassie gewaar het. Hopelik vat hulle my nie huis toe en maak my deel van die ornamente nie,” skerts hy.
Sasha-Lee, wat in 2009 die medewenner van seisoen 5 van Idols SA (2002-nou) was [saam met Jason Hartman], beskou die aanbieding as ’n nuwe avontuur. “Dis wonderlik om my loopbaan uit te brei en by die TV-uitsaaibedryf betrokke te raak,” sê sy. Dit was wel ’n uitdaging om heeltyd Afrikaans te praat. “Ek het ’n Engelse agtergrond en was in ’n Engelse skool. Al kan ek goed Afrikaans praat, was dit soms moeilik om nie na Engels oor te skakel wanneer ek ’n onderhoud voer of ’n insetsel verfilm nie,” erken Sasha-Lee.
DIEREHOTEL TOT HAARSALON
Omdat die nuwe seisoen se tema drie is, word daar in elke episode drie eiesoortige of uiteenlopende aktiwiteite en ervarings beproef, natuurlik saam met ’n bekende. So word daar in episode 2 (24 Oktober) gefokus op drie van die lekkerste dierebederfhotelle, en Amalia gaan saam met die sangeres Claire Johnston van die musiekgroep Mango Groove en haar hond Sam in een van die hotelle oornag. Daar is ook haarsalonbesoeke waar die hare gaan waai en spesiale treinritte. Maak dus seker jy skuif Woensdagaande reg om alles mee te maak!
HET JY GEWEET?
Amalia is ook agter die skerms van Pasella betrokke as teksskrywer. “Aanvanklik het ek net vir my eie insetsels tekste geskryf, maar ek help nou ook met die ander aanbieders se tekste,” sê sy. “Dit gee my die geleentheid om my kop in ’n ander rigting te stuur. Ek geniet veral die navorsingsgedeelte wat gepaardgaan met die skryf van tekste. Dis ’n lekker uitdaging,” voeg Amalia by.