Taai tronklewe GEVAARLIKE SUSTERS
Litchfield se geharde tronkvoëls word die nuwelinge wanneer maksimumveiligheidstraf hul voorland is.
Orange Is The New Black Seisoen 6 Woensdae M-Net (*101) 23:00 (begin 31 Oktober)
Die onbekende wag op die vrouegevangenes in die Litchfield-tronk in seisoen 6 van Orange Is The New Black (OITNB, 2013-nou) ná seisoen 5 se oproer oor die moord op Poussey (Samira Wiley). In storieterme het net tien dae verloop sedert haar dood aan die einde van seisoen 4 (September 2016), maar dis ’n hele nuwe wêreld vir haar vriende, wat verdeel en na verskillende gevangenisse oorgeplaas word. Die reeks handel nou oor die vroue wat na ’n maksimumveiligheidstronk gestuur word weens hul sleutelrol in die Litchfield-opstand, tesame met die wagte se leuens, toesmeerdery en die blaam wat op een gevangene geplaas word vir die tronkoffisier Piscatella (Brad William Henke) se dood, wat per ongeluk deur die onlustepolisie doodgeskiet is in die seisoen 5-finaal (Desember 2017). “Daar’s geen uitweg as jy ’n tronkopstand begin nie, want jy word reeds as die skuim van die samelewing beskou,” waarsku Danielle Brooks (Taystee). “En nuwe gevangenisse beteken nuwe wagte, nuwe selmaats. Jy moet jou bondgenote, jou ‘stam’ vind. Jy moet van voor af begin.” Die sleutelgroep van die Litchfieldvroue sal ’n oorlogsone betree, en hulle sal nie kant kan kies nie. Die moorddadige, kleinlike susters Carol en
Barbara (Henny Russell en Mackenzie Phillips) beheer elk ’n selblok, en dwing diegene onder hul duim om mekaar te saboteer in hul haatoorlog teen mekaar. En nog erger, die bose susters koester ’n ou wrok teen een van die Litchfield-vroue en wil wraak neem! “Albei gebruik mense tot hul eie voordeel en hulle het nie emptie met enigiemand buiten hulself nie,” vertel Henny.
WELKOM TERUG!
Die enigste Litchfield-vroue wat ons gaan sien is: Aleida (Elizabeth Rodriguez), Alex (Laura Prepon), Black Cindy (Adrienne C. Moore), Blanca (Laura Gómez), Daya (Dascha Polanco), Flaca (Jackie Cruz), Frieda (Dale Soules), Gloria (Selenis Leyva), Maria (Jessica Pimentel), Morello (Yael Stone), Nicky (Natasha Lyonne), Pennsatucky (Taryn Manning), Piper (Taylor Schilling), Red (Kate Mulgrew), Sophia (Laverne Cox), Suzanne (Uzo Aduba) en Taystee.