Pokémon: Sun & Moon Ultra
Seisoen 21 e.tv (*194) 15:30 Animasie
Baie min TV-programme haal 21 seisoene, maar dis net die begin vir die Japanse animasiereeks Pokémon (1997-nou). Daar is ook 21 animasieflieks, handelsware wat van pantoffels tot speelkaarte insluit, en ’n jaarlikse omset van $2,1 biljoen (R31 biljoen). En om te dink dit het alles met ’n videospeletjie begin.
Pokémon was aanvanklik ’n paar videospeletjies wat in 1995 geskep is vir Nintendo se Game Boy-handkonsole, maar die kopiereg en handelsmerk word nou gedeel deur drie videospeletjiesmaatskappye: Game Freak, Creatures en Nintendo. Elke seisoen het ’n ander titel, wat ooreenstem met die videospeletjie wat in daardie tyd uitgereik word. Dit speel ook af in verskillende wêrelde, met nuwe Pokémon-monsters asook ander elemente soos die temaliedjie. Daar is meer as 1 000 episodes in die Pokémon-reeks, met 47 daarvan in die Sun & Moon Ultra-seisoen. Ses episodes is nog nooit buite Japan uitgesaai nie weens inhoud soos rook. Die Pokémon-skepper Satoshi Tajiri se rykdom word op $5 biljoen (R73 biljoen) geraam, hoewel dit nie net hiervoor is nie – hy het ook aan Nintendo se handelsmerk Super Mario gewerk. Sun & Moon Ultra is een seisoen, maar daar is drie videospeletjies – Sun, Moon en Ultra Adventures. Dis omdat Satoshi soveel bywerkings by die storielyne gehad het, dit was te moeilik om alles by een uitreiking in te sluit. Daar’s twee groot verskille in seisoen 21: die storielyne vir die hoofkarakter Ash is korter, en hy en sy Pokémonsters verwerf nie meer gevegsmedaljes tydens hul reis nie.