Nou in Amerika
BOLD
Brooke en Ridge het ’n woordewisseling oor hul gevoelens van verraad jeens mekaar, en Ridge en Thorne het ’n broederlike kla-sessie oor die bose Bill. Katie oorweeg dit om die toesigooreenkoms oor klein Will te verander ná Brooke haar vertel Ridge het die regter afgepers, en Wyatt bedank by Spencer Publications sodat hy as sosialemedia-bestuurder saam met Sally by Forrester Creations kan werk. Steffy klik by Hope en Ridge oor Brooke en Bill wat soen, maar weet nie Brooke het hom later verwerp nie. Donna keer terug, en Charlie vra Pam uiteindelik die jawoord!
DAYS
Lucas kondig aan hy wil alleentoesig oor baba Bonnie hê, en Belle is in die middel vasgevang wanneer Mimi en Chloe se skoolterrein-wedywering sy aaklige kop uitsteek. Rex Brady ( ja, een van die ruimtetweeling wat tydens die meteoorreën verskyn het – nou gespeel deur Kyle Lowder) is terug in Salem, en Claire konkel sodat sy Ben kan dwing om haar te help om Tripp en Ciara uitmekaar te dryf. Gabi probeer Chad sover kry om Abby na ’n inrigting te stuur, en Kristen besef Brady het haar doelbewus uitgevang om seks te hê as deel van ’n komplot teen haar. Elders gaan Sami en Eric in Xander se plek rondkrap net wanneer Nicole uit Xander se kloue ontsnap.
Y&R
Die Jabot-raad verwyder die klousule wat bepaal net biologiese Abbotts mag die maatskappy bestuur, en Ashley word as die maatskappybaas ingestem. Dan vertel Ashley Jack ’n regte DNS-toets het bewys hy is wel John Abbott se biologiese seun – sy het Andrew net betaal om met die uitslag te peuter. Victoria, Phyllis en Sharon kry almal nuwe notas met die boodskap: “As jy nie wil hê enigiemand moet uitvind wat jy gedoen het nie, gaan dit jou kos.” En Billy vererg hom en los Summer om Phyllis terug te kry ná hy uit rehab ontslaan word.