Op julle merke!
Die realiteitskompetisie The Amazing Race stel die deelnemers se verhoudings op die proef in seisoen 27.
The Amazing Race Seisoen 27 Maandae SABC3 (*193) 19:30 (begin 19 November)
As daar een ding is wat kykers van The Amazing Race (2001-nou) geniet, is dit om te sien hoe goed die twee deelnemers in elk van die elf spanne met mekaar oor die weg kom tydens hul resies oor die aardbol heen. Dit maak nie saak of hulle geblinddoek is tydens ’n uitdaging of hul weg deur ’n besige middestad moet vind nie, die emosionele reis is byna net so belangrik as die prysgeld van $1 miljoen (R14 miljoen) vir die wenspan. “In seisoen 27 is die deelnemers baie uiteenlopend,” sê die aanbieder, Phil Keoghan. Hy voeg by dis die eerste keer dat hulle sulke TVvriendelike spanne het by wie kykers ook aanklank sal vind. “Dit sal interessant wees om te sien hoe so ’n ondervinding [reis deur die wêreld binne 21 dae met kameras wat jou volg] bestaande verhoudings beïnvloed. The Amazing Race is eintlik net ’n verskoning om te sien hoe twee mense wat ’n verbintenis het, uitdagings aanpak. Dis moeilik maar kan ook pret wees,” skerts Phil. 1 #TheDancers Ernest (29) en Jin (26) is hiphop-danserbroers wat oorgehaal is vir die resies. “Ons het Europa platgereis met danstoere, dus weet ons hoe om heeltyd aan die gang te wees,” sê Ernest.
2 #TheReporters Kelsey (25) en Joey (26) is nuusankeraanbieders wat uitgaan en reken hul voordeel bo die ander is hul vermoë om stres te hanteer weens hul druk werkomgewing. “Niks kan ons van stryk bring nie,” sê Joey selfversekerd.
3 #TeamTexas Die boesemvriende Tanner (26) en Josh (28) is baie mededingend en sal tot hul voorkoms gebruik om ’n voorsprong te kry, erken Josh: “Ons is aantreklik en om alliansies met die meisies te vorm kan net help!”
4 #TheGreenTeam Die verloofdes Justin (39) en Diana (30) het oor hul liefde vir die program by mekaar uitgekom. Justin se 2014huweliksaansoek was aanlyn en het ’n Amazing Race-tema gehad.
5 #TeamTMZ
Kelly (37) en Shevonne (31) neem ’n blaaskans van hul blogwerk by die vermaakwebwerf TMZ.com en Kelly draai nie doekies om nie: “Ons is reguit, genadeloos en kritiseer mense vir ’n lewe.”
6 #TeamAlabama Denise (51) en James (26) hoop The Race sal hul ma-seun-band help herstel. “Ons het ophou praat toe ek uit die kas geklim het,” erken James. “Hopelik kan die spanwerk ons help om mekaar beter te verstaan.”
7 #ThePaparazzi Chris (46) en Logan (36) weet hulle werk goed saam as ’n span, by die huis as ’n getroude paar sowel as in die werkplek – hulle is paparazzifotograwe en is gewoond daaraan om van plek tot plek te jaag.
8 #TheCheerleaders Die gesondheidskonsultant Tiffany (28) en spraakterapeut Krista (28) is vriendinne en flous mense met hul sexy voorkoms. “Ons was rasieleiers, maar ons is uitgeslape,” sê Krista.
9 #ChacAttack Die dokters Cindy (36) en Rick (38) stel hul nuwe huwelik op die proef. Sy’s ’n tandarts en hy ’n verloskundige en Rick sê: “Ons wil sien hoe goed ons as ’n span kan saamwerk voor ons met ’n gesin begin.”
10 #TheTrackStars Jazmine (23) en Danielle (23) is besties, kamermaats en adrenalienverslaafdes. Hul opponente moet in hul pasoppens wees, waarsku Jaz: “Ons is baie mededingend en was regdeur universiteit goeie atlete.”
11 #TheCousins Alex (22) en Adam (24) is kibbelende neefs wat hul humeur in toom wil leer hou. “Ons kan driftig raak in stresvolle situasies. Ek hoop ons gaan mekaar nie verskree nie,” bieg Alex.