Spirituele reise
’n Objektiewe kykie na meer onbekende geloofsgroepe.
Openbarings Seisoen 1 Donderdae VIA (*147) 20:30 (begin 15 November)
Al is onortodokse gelowe soos die Jehovasgetuies en die Mormone nie onbekend nie, weet min mense wat hierdie gelowe se leerstellings en oortuigings werklik behels. En as jy nog altyd meer wou uitvind oor hoe presies dit werk, kan jy meer te wete kom in die reeks Openbarings wat deur die aktrise Sandra Prinsloo (Mientjie in Mense Mense, 2018) aangebied word. In elke episode gesels Sandra met huidige sowel as oudlede van verskeie geloofsgroepe en sektes, waarna kenners ’n objektiewe kykie na die praktyke en filosofieë van hierdie groepe gee.
GEEN AANVAL OF OORDEEL NIE
Konrad Kuhn, uitvoerende vervaardiger van Openbarings, sê dis vir hom fassinerend wanneer mense hul blindelings deur doktrines laat lei. Omdat daar soveel verskillende sektes, geloofsgroepe en filosofieë is, het die vervaardigers besluit om te fokus op onortodokse gelowe waaroor die meeste vrae gevra word. Buiten die Jehovasgetuies kom ander kerke en groepe soos Seven Angels Ministry, Rabboni Centre Ministries, Die Dogter Van Sion, Sciëntologie, Universal Church Of The Kingdom Of God en Grace Gospel Church in die kollig. “Ons kyk ook kortliks na internasionale groepe en hul leiers, soos Jim Jones van die Peoples Temple en David Koresh van groepe soos Shepherd’s Rod en leier van Branch Davi- dians, wat hom as ’n profeet voorgedoen het voor hy in 1993 oorlede is.”
Die grootste uitdaging om Openbarings te vervaardig was om ’n vertrouensverhouding met elke groep te probeer opbou, vertel Konrad. “Ons het dit uit die staanspoor duidelik gemaak ons wil niemand aanval of probeer uitvang nie. Ons het elke groep objektief probeer benader en na die negatiewe sowel as die positiewe gekyk.”
DOELWIT VAN REEKS
“Die fokus van Openbarings is nie soseer om die groepe se leerstellings te kritiseer nie, maar om te kyk hoe en waarvolgens die onderskeie groepe funksioneer en of hul leiers blindelings nagevolg word en ’n positiewe invloed op hul lewe het,” voeg Konrad by. “Op die ou end gaan dit daaroor of die lede se lewe verryk word of nie.”
Daar was sekere geloofsgroepe soos Christ In Me International en Universal Church Of The Kingdom Of God wat nie bereid was om aan die reeks deel te neem nie. “Dit was eintlik vir my vreemd, want Openbarings is ’n platform om kykers meer van verskillende leerstellings te vertel,” sê Konrad.
Die meeste groepe het uitnodigings aanvaar en ingestem om oop kaarte te speel. “Lede van die Jehovasgetuies het byvoorbeeld openhartig gesels oor hul weiering om bloedoortappings te kry.”
Die navorsers Helena Nell en Christa Steyn het met behulp van Henk Stoker, professor in teologie aan die Noordwes-Universiteit, vooraf navorsing oor die onderskeie groepe gedoen. “Ons het ook besluit om Sandra Prinsloo as aanbieder in te span omdat sy meer gravitas aan die sensitiewe onderwerp verleen. Al die verskillende leerstellings en hoe dit in die lidmate se lewe neerslag vind, het Sandra nog altyd geprikkel.”