Tente en tirades
Camping is die perfekte kans om agteroor te sit en ander mense se ongerief te geniet.
Wie’t lus vir ’n kampeervakansie, waar jy van die dolle gejaag kan wegkom en die natuur en vars lug geniet? Dit kan jou sterre in die oë gee as jy die reëls volg om gelukkige herinnerings skep. Maar die komediereeks Camping (seisoen 1 is nou eksklusief beskikbaar op die stroomdiens Showmax) raak heeltemal van koers af deur vyf top-wegbreekwenke te ignoreer . . .
KIES JOU GESELSKAP
Niemand wil die slagoffer van ’n reeksmoordenaar in die bos word nie, moet dus nie alleen gaan kampeer nie. Maar goeie geselskap is net so belangrik soos die regte stapskoene vir ’n wonderlike ervaring. Jou kampeermaats sal jou ongewas en beswete sien, terwyl jy met ’n toiletrol in die bosse verdwyn . . . Daarom behoort hulle gawe mense te wees wat jou nie van agter sal bekruip en met ’n stok die spinnekop-skrik op die lyf jaag nie. In Camping bestuur die beheervraat Kathryn (Jennifer Garner) haar man se verjaardag-wegbreek met ’n ysterhand. Ná haar uur lange geskree sou ons graag in die nag wou wegsluip – maar nie voor ons haar tent met grondboonbotter besmeer en haar vir die bere los nie.
BRING KAMPEERTOERUSTING, NIE BAGASIE
Kathryn en haar gaste bring kwessies saam wat nie oor ’n naweek opgelos kan word nie, soos haar man, Walt (David Tennant), wat uitgehonger is vir seks. Daar’s ook haar bedeesde suster Carleen (Ione Skye), Walt se broer George (Brett Gelman) en sy metgesel, Kathryn se gewese bestie
Nina-Joy (Janicza Bravo), Walt se kollegepel Miguel (Arturo del Puerto) en sy nuwe fling, Jandice (Juliette Lewis). Kathryn het nog nie eens klaar afgepak nie voor sy begin lostrek oor haar en Walt se probleme met intimiteit – die gevolg van haar chirurgie. (Sy’t so min lus vir seks, later laat selfs die kampvuur-worsbroodjies haar gril!)
ONTSPAN!
Terwyl jy van die beskawing ontsnap, is dit die ideale geleentheid om die vryheid te geniet, konvensies oorboord te gooi en kaal te swem as jy wil! Geskeduleerde groepsaktiwiteite soos fossielsoektogte behoort net as ’n laaste dreigement genoem te word as mense verveeld begin lyk. Tot dan behoort elkeen toegelaat te word om sy of haar eie soort pret te hê. Jandice het die regte idee en die hele groep kry lewe en volg haar wanneer sy in die meer duik vir ’n verfrissende swem – al het Kathryn ’n vol dag met voëlkykery beplan. Kathryn kan net op die oewer staan en waarskuwings skree oor sonskerm en ongediertes in die water, en die feit dat sy ’n lewensredder is.
NEE VIR INSTAGRAM
Een van die plesiere van ’n kampeerwegbreek is om van die alewige tegnologie te vergeet. Foto’s vang goue oomblikke vas, ja, maar wie wil foto’s van ’n private uitstappie op Instagram plaas sodat hulle “likes” kan kry? Dit kan net pyn veroorsaak. Kathryn het ’n Instagram-rekening oor chroniese pyn en die lewe as ’n werkende ma met 11 000 volgelinge. “Jy het geen idee hoe dit is om ek te wees nie. Kyk jy ooit na my Instagram? ‘Dankbaarheid’ is die hutsmerk wat ek die meeste gebruik,” teem sy.
GEEN BABBELBEKKE
Die gespanne en onplesierige hengeluitstappie in episode 3 is ’n waardevolle les vir een van kampeer se belangrikste riglyne: Geniet die natuur in stilte. Kampvuurgeselsies is heerlik en gesellig, maar daar’s soveel ruimte om in stilte na die mooi om jou te kyk en vir ’n verandering na die natuur te luister. Moet dus nie soos ’n irriterende muskiet in jou medekampeerders se ore zoem nie. Sjuut . . .
WAT IS SHOWMAX?
Showmax is Afrika se grootste internet-TV- diens, met meer as 35 000 program-episodes, dokkies en flieks teen net R99 per maand, R49 vir DStv Compact-intekenare of gratis op jou DStv Premiumrekening*. Gaan na showmax. com om in te teken vir jou gratis tweeweke-proef tydperk, en kry toegang tot eksklusiewe programme soos Vikings, Succession en duisende meer!