Geen verskietende ster

Tarryn skitter as die dowe, funky kelnerin in Dwaalster.

Vir die rol van die dowe kelnerin Gina Devine in die dramareeks Dwaalster moes die Kaapse aktrise Tarryn Wyngaard (27) gebaretaal leer en leer rolskaats. Sy moes ook ’n blou kontaklens dra, want Gina se een oog is blou en die ander een groenbruin. “Dit was alles ’n reuse-uitdaging,” vertel Tarryn. “Rolskaats is nie so moeilik nie, maar as jy moet rolskaats en terselfdertyd ’n skinkbord met glase of koppies en pierings balanseer, moet jy jou storie ken.”

Gina is op die oog af ingetoë en beskeie, maar daar skuil veel meer onder daardie komkommerkoel fasade, sê Tarryn. “Sy is baie sensitief vir energie, veral donker energie. Gina kry voorgevoelens oor wat in die toekoms met sekere mense gaan gebeur, veral wan- neer die bloedmaan verskyn.” Maar die inwoners van die klein Karoo- dorpie Maanhaarsdrif loop nie draaie om Gina en haar sesde sintuig nie, want sy is hul morele kompas.

INTENSIEWE VOORBEREIDING

Tarryn het voor die verfilming van Dwaalster sowat ses weke lank intense voorbereiding vir die uitsoekrol gedoen. “Ek het gebaretaal by Jessica en Christopher Bothma, wat albei doof is, sowel as Jabaar Cassiem Mohamed, die provinsiale direkteur van die Federasie van Dowes in Suid-Afrika, geleer,” sê sy. Christopher het ook stel toe gekom vir die tonele waar Tarryn gebaretaal moes doen om haar verder touwys te maak.

Die rolskaatsery het baie oefening geverg. “Ek kan rollemskaats, maar het nog nooit gerolskaats nie. Amore van Sittert van die Cape Town Rollergirls het my geleer rolskaats. Ek het ’n paar weke voor ons begin skiet het elke dag van Seepunt tot Mouillepunt in Kaapstad gerolskaats om die tegniek heeltemal onder die knie te kry,” vertel die aktrise.

Gedurende verfilming op Bonnievale het Tarryn gereeld in die dorpie gerolskaats om vir haar toneel op te warm en in oefening te bly. “Ek het gelukkig nie een keer tydens tonele geval nie. Dit was wel moeiliker wanneer ek doodstil op die rolskaatse moes staan.”

Gina is supercool, vertel Tarryn, en dit word deur haar kleredrag weerspieël. Mariechen Vosloo van Marche Media se garderobe-afdeling het Gina se kleurryke kostuums uitgekies. “En Gina kou gereeld kougom en blaas borrels, wat haar nog meer funky maak,” voeg Tarryn by.

GINA SE VERLEDE

Net soos vele van die ander karakters in Dwaalster het Gina ’n interessante en misterieuse verlede. “Gina woon nie lank op een plek nie en skiet nie maklik wortel nie. Sy het op Worcester by die Skool vir Dowes skoolgegaan, maar uiteraard nie goed leer spel nie,” sê Tarryn.

Ná skool het Gina by ’n groep motorfietsryers aangesluit – en dis waar haar paaie met haar ekskêrel die sterrekyker Charlie (Albert Pretorius) gekruis het. “Maar toe hul groep ysterperdgeesdriftiges op ’n keer met hul motorfietse op Maanhaarsdrif was, het sy ’n psigiese konneksie met die dorpie gevoel en besluit om daar te bly. Maar Charlie is steeds verlief op Gina en wil haar terugwen,” vertel sy.

Die ambisieuse kroegman Randall (Jarrid Geduld), Gina se kollega in die restaurant Die Piering, en Gina het goeie vriende geword. “Jarrid moes ook gebaretaal leer praat om met Gina te kommunikeer. Sy kan egter goed liplees wanneer sy klante bedien.”

Tarryn vertel daar was negatiewe kritiek omdat ’n dowe nie vir die rol gekies is nie. “Maar dit is moeilik om iemand te kry wat doof is en terselfdertyd kan toneelspeel – en rolskaats. Ek hoop net ek het Gina realisties uitgebeeld en dat kykers van haar hou.”