Werk of liefde?
Franz lok Elana na Kanada met ’n top-werkgeleentheid.
Dr. Franz Basson (David Minnaar) kan dit nie langer ontken nie: Hy is verlief op sy goeie vriendin dr. Elana Bester (Ilne Nienaber). En sy kans om haar syne te maak sal verbeter as sy permanent saam hom in Kanda gaan werk – 'n geleentheid wat die loopbaangedrewe Elana nie sommer deur haar vingers wil laat glip nie. Maar wat gaan haar kêrel, die plastiese chirurg Steve Abrahams (Clint Brink), daaroor sê?
TWYFELGEDAGTES KRUIP IN
Elana is in haar noppies wanneer Franz haar vra om hom in 'n baanbrekeroperasie by te staan terwyl hy by die Binneland-kliniek uithelp. “Elana voel gevlei deur Franz se vertroue in haar vermoëns, maar terselfdertyd twyfel sy in haar hart of sy die soort operasie sal kan behartig,” sê Ilne.
Steve ondersteun Elana en verseker haar sy is meer as goed genoeg om Franz te help, maar dan kom plant die mededingende dr. Annelize (Cindy Swanepoel) sade van wantroue in sy gedagtes. Clint verduidelik Annelize bevraagteken Franz se ware bedoelings met Elana. “Sy wys daarop Franz en Elana het 'n geskiedenis en was amper 'n paartjie voor hy na Kanada verhuis het [in 2015]. Elana kan tussen 'n beroeps- en 'n persoonlike verhouding onderskei, maar sal Franz dit kan doen?”
BLIND VIR DIE WAARHEID
Die operasie is 'n groot sukses en Elana is in die wolke. Steve aan die ander kant se onrustigheid oor Franz en Elana se vriendskap groei, en hy konfronteer haar daaroor. “Elana was nog altyd meegevoer deur Franz, maar spesifiek as gevolg van sy talent en kennis as chirurg,” sê Ilne. “Steve se konfrontasie stel haar dadelik op die verdediging en sy beskuldig Steve eerder van jaloesie as om haar oë oop te maak vir wat Franz se ware bedoelings met haar is.”
DIE VERSOEKING
Elana en Steve maak later vrede, maar met Franz in die omtrek bly dinge krapperig en dis nie lank voor hulle weer koppe stamp nie. “Steve voel hy is besig om Elana te verloor,” sê Clint. En hy is dalk reg, want Franz bied vir Elana 'n werkgeleentheid in Kanada aan waar sy as neurochirurg kan kwalifiseer.
“Die versoeking om alles te los en Kanada toe te gaan, is groot,” sê Ilne. Sy is bereid om 'n langafstand-verhouding met Steve te hê, maar hy wil niks daarvan hoor nie. Gaan Elana haar werk bo die liefde kies?