Married To Medicine
Seisoen 6 Sa. Vuzu (*116) 20:30 & 21:30 Herhalings Wo. 15:00 & 16:00 Realiteit
Dr. Jackie Walters het die tweede helfte van die realiteitsreeks Married To Medicine (2013-nou) se seisoen 5 gesnik ná sy verneem het haar man Curtis is ontrou, en het hom die huis verbied. In seisoen 6 (episodes 3 en 4 word vandag herhaal) is dr. Jackie weer in beheer en hulle werk deur hul probleme, wat ’n groot stap is want Jackie het hom drie dae ná sy verneem het hy’s ontrou om ’n egskeiding gedagvaar.
“Ontrouheid . . . Ek het aanvanklik moorddadig gevoel,” sê dr. Jackie. “Dit [om te skei] was nie ’n vinnige besluit nie. ’n Mens is eers getraumatiseer veral ná jy op jou iPad daarvan uitvind.” Sy erken die kameras was af toe sy dit aanvanklik uitvind, want sy was hewig onsteld en ’n pasiënt het boonop vir haar gewag. Die 60-jarige het drie grade – twee BSc- grade van die universiteit van Mississippi en die Alcorn Stateuniversiteit plus haar mediese graad van die universiteit van Mississippi se mediese skool. Nie een van die reeks se spelers is uitvoerende vervaardigers soos die meeste ander realiteitsreekse nie, maar dit pas Jackie: “Ek is ’n OBGYN [verloskundige en ginekoloog], nie ’n TV-vervaardiger nie.” Sy het twee keer borskanker gehad en het die Women’s Wellness Program in Atlanta gestig, asook die 50 Shades Of Pink Foundation wat mans en vroue met borskanker ondersteun. En al hou sy van haar reeks, verkwalik sy dit vir Curtis se ontrouheid en sê: “Sy openbare persona dra daartoe by. Om op TV te wees laat vroue dink, ‘Miskien het hy baie geld wat ek kan kry.’”