Making A Model
Seisoen 1 SABC3 (*193) 19:30 Realiteit
Yolanda Hadid weet waarvan sy praat as aanbieder van die realiteitsreeks Making A Model (2018-nou), want sy het die loopplank as ’n beroepsmodel bemeester en weet wat dit verg om van jongs af suksesvol te wees. Haar seun, Anwar (19), en dogters Bella (22) en Gigi (23) is almal ook in die bedryf. Maar daar’s baie wat jy nie oor die voormalige loopplankkoningin weet nie, soos een van haar gunsteling-vakansieplekke, wat baie nader is as wat jy dink . . .
Die 55-jarige is Nederlands en haar geboortenaam was Yolanda Johanna Jacoba van den Herik. Sy is in 2011 met die filmkomponis David Foster getroud nadat sy in 2000 van die eiendomsontwikkelaar Mohamed Hadid geskei is ná ses jaar en drie kinders. Sy het haar naam na Yolanda Hadid verander nadat sy in 2017 van David geskei is. Yolanda was as tiener ’n deeltydse modemodel en is per ongeluk internasionaal raakgesien. Sy was ’n plaasvervanger vir die ontwerper Frans Molenaar se vertonings en is deur Eileen Ford, medestigter van die modelagentskap Ford Models, opgemerk en ná die vertoning gewerf. Sy het in Januarie vanjaar al haar plastiese chirurgie ongedaan laat maak en ander skoonheidstruuks laat verwyder, van borsvergrotings en lipvullers tot haarverlengstukke. Sy het op instagram gesê: “Dit het lank geduur om my slegte keuses om te keer. Ek het die vryheid van innerlike skoonheid.” Sy het amper ’n dekade lank aan Lyme-siekte gely – liggaamlike verswakking weens ’n luisbyt. En Yolanda het as model op Kaapstad verlief geraak waar sy dikwels kom vakansie hou.