Kyk wie’s terug!
Simoné Nortmann pronk op die kassie in ’n sepie en ’n komedie.
Die aktrise Simoné Nortmann (28) het in 2013 harte verower as die rebelse tiener Nadia Croukamp in 7de Laan (2000-nou). In 2015 het sy besluit om die sepie te verlaat en vryskutrolle aan te pak, maar nou is sy terug in sepieland as suster René Spies in Binnelanders (2004-nou). En sy hou nie net haar kollegas in die Binneland-kliniek op hulle tone nie, maar kykers ook.
’N GROOT VERRASSING
Haar rol in Binnelanders sou aanvanklik net vir ’n paar weke wees, maar toe word sy ’n jaarkontrak aangebied. “Dit was ’n verassing,” sê Simoné. “Ek was nie van plan om my weer vas te maak by ’n sepie nie. Maar ek het oor die saak gebid en toe kom die antwoord en ek raak deel van die Binnelanders-familie.”
Sy is al sedert September in suster René se skoene, al word die episodes nou eers uitgesaai. “René is ’n rabbedoe, girl next door, run away bride, boheemse vrou,” sê sy en voeg by kykers gaan nog lief raak vir haar.
Ons sien nou nog net een kant van René, maar mettertyd sal ons ’n meer stabiele, sagte kant van haar sien. “Maar daar wag nog ’n paar kinkels in René se storielyn wat die wenkbroue gaan laat lig,” verklap Simoné.
VRIENDE IN DIE BEDRYF
Wanneer sy nie haar lyf verpleegster hou nie, is sy ontvangsdame by die Fransen-hotel in die komediereeks Hotel (2016-nou), Maandae om 20:30 op kykNET. Komedie lê haar na aan die hart en sy is kinderlik opgewonde oor die opname van die vierde seisoen later vanjaar. “Toe ons hoor daar gaan nog ’n seisoen wees, het dit vir my ’n gevoel van opgewondenheid en veiligheid gegee – want dis nog nie die einde nie,” vertel Simoné. “Daar is soveel potensiaal vir elke karakter se storie om verder te ontwikkel en in verskeie rigtings te beweeg. En ek kan nie wag om te sien wat die skrywers gaan neerpen nie.”