SUPERNATURAL
Seisoen 15 M-Net City (*115) 20:00 Episode 1
(sci-fi) Vrydag 10 Julie
Dis die begin van die einde vir Supernatural (2005-nou) wanneer die allerlaaste seisoen wegspring met die broers Sam (Jared Padalecki) en Dean (Jensen Ackles) wat weer met hul engelpel Castiel (Misha Collins) saamspan. Die seisoen begin waar seisoen 14 geëindig het met God (Rob Benedict, Jonathan Laurents in Masters Of Sex, 2013-2019) wat die hel se poorte oopgemaak en al die slegte demone op Aarde vrygelaat het. “Episode 1 is soos ’n mini-apokalips waartydens die demoonjagterbroers en Castiel bose geeste moet afweer en die lewende dooies moet hanteer,” sê die uitvoerende vervaardiger Andrew Dabb.
Vanaf die eerste oomblikke is die drie in ’n konfrontasie met God, wat in ’n apokaliptiese bui is, maar nie met ’n vloed soos in die Bybel nie. “Die nadraai van so baie gevare in die wêreld sal regdeur die seisoen weerklink,” sê Andrew. Die uitvoerende vervaardiger Bob Singer voeg by: “Wanneer God jou opperste booswig is, is dit nie ’n saak vir een episode nie. In ’n sekere stadium gaan God op volle sterkte wees, wat die drie selfs meer probleme besorg.”