’n Musiekmisterie
The Masked Singer is terug en gaan jou laat raai watter glanssterre is onder daardie kostuums versteek.
Dis ’n groot extravaganza! Oordadige kostuums, ’n singery, dansery en ’n gespeur is deel van die realiteitsprogram The Masked Singer, Donderdae op M-Net (*101) om 19:00. ’n Groep beroemde mense versteek hul identiteit agter die kwistige, belaglike, briljante en kleur volle kostuums terwyl ’n paneel beoordelaars met ’n reeks leidrade en deur hul optrede probeer raai wie die sterre is. Die kompetisie is egter net ’n vertoon vir die kostuums wat die deelnemers dra. Dis eksoties, vreemd en baie spesifiek, veral in seisoen 2, en ons het al die sappige detail by die reeks se kostuumontwerper, Marina Toybina, gekry.
BEKENDE GESIGTE
Maar voor ons by die mal kostuums en naaimasjiene kom, ontmoet die aanbieder, beoordelaars en sommige van die glanssterre in seisoen 2.
Die musikant en akteur Nick Cannon (die aanbieder van 2009-2016 van die realiteitsprogram America’s Got Talent, 2009-nou) bied die nuwe reeks aan, saam met die sexy sangers Nicole
Scherzinger (bekend vir haar liedjie Your Love, 2014) en
Robin Thicke (bekend vir die liedjie Blurred Lines, 2013) terwyl die akteurs Jenny
McCarthy (sy was in 2016 in The Real Housewives Of Beverly Hills, 2010-nou) en Ken Jeong (Luther in Magnum P.I., 2018-nou) as beoordelaars by hom aansluit.
En sonder om te veel te verklap – kykers kan ook uitsien na die sangers Seal (1994-liedjie Kiss From A Rose) en Chris Daughtry (bekend vir seisoen 5 in 2006 van American Idol, 2002-nou) wat gemasker aan die kompetisie deelneem, asook die TV-persoonlikheid Kelly Osbourne (Fashion Police, 2010-2015) en Whose Line Is It Anyway? (1998-nou) se sketskomediant Wayne Brady wat van kop tot tone in sy kostuum bedek sing. Moenie die pret bederf deur te Google wie dra watter kostuum nie – die onthulling is wat dié program sy skop gee!
DIE KOSTUUMS
Marina sê met die aanvang van seisoen 2 was haar “doel om die algehele konstruksie van die kostuums, asook die karakters op ’n vermaaklike manier te verbeter”. Dit kan tot vier maande duur om dié kostuums te skep, en Marina en haar span moet 20-25 sketse vir goedkeuring aan die vervaardigers voorlê voor hulle een steek kan werk.
Dié seisoen het 16 deelnemers en elkeen kry ’n sê in die uitrusting waarvan hulle hou. Hulle kan selfs veranderinge voorstel om by hul persoonlikhede en agtergrond te pas. In die daaropvolgende maand en ’n half word die naaldwerk gedoen, verduidelik Marina. “Dís die uitdagendste deel vir my. Dit lyk uitstekend op papier, alles lyk magies, maar hoe maak jy dié ontwerpe lewensgrootte kuns wat jy kan dra?”
Een van Marina se gunstelinge was die luiperd. Die katkostuum is in ’n baie minder mate die uitgeslape jagter en baie meer flambojant met sy periodekostuumkraag. “Die meeste mense verwag ’n luiperdkostuum moet met dieremotiewe oortrek wees, maar ek wou iets Victoriaans en antieks skep met ’n groot impak op die verhoog,” sê die kostuumontwerper. Haar inspirasie was die periodedrama uit 1998, die fliek Elizabeth met Cate Blanchett in die rol van koningin Elizabeth.