Liewe monsters!
Lykrowers, aardgeeste en ander nare gediertes kry ’n skattige oormaak in dié animasieflieks op Showmax.
Die wêreld is soms ’n skrikaanjaende plek met genoeg monsters. Maar soms is hulle nie so afgryslik soos hulle lyk nie. Showmax het genoeg liewe skepsels wat jou kinders se aandag kan aflei van die monsters onder hul bed. Kyk gerus dié animasieflieks en hul oulike gruwels.
ZOG (2018)
Dié animasiefliek is gegrond op Julia Donaldson se gelyknamige boek van 2010 en is deur die Triggerfish Animation Studio in Suid-Afrika vervaardig en geanimeer. Dit vertel die verhaal van Zog, ’n oulike, maar lomp, oranje draak met ’n horing en vlerke. Hy lyk soos ’n groot skrikaanjaende gedierte, maar hy is skattig, wil net aanvaar word en sy klasse by die draakskool slaag. Stem: Kit Harington (Jon Snow in Game Of Thrones, 2011-2019).
THE GRUFFALO (2009)
Julia Donaldson se skepping vir die gelyknamige kinderboek van 1999 kry lewe in dié stop-aksie-fliek. Dit volg ’n muis op sy avontuur deur die woud op soek na kos, maar hy kom drie groot vreesaanjaende diere teë – ’n jakkals, ’n uil en ’n slang. Almal sal hom sonder om twee keer te dink vir ontbyt opvreet. Om hulle af te skrik, vertel hy hulle hy is op pad om die kammaGruffalo – ’n selfs meer vreesaanjaende monster wat hulle sal vreet – te ontmoet. Maar die Gruffalo bestaan werklik en het ’n hart van goud. Stem: Helena Bonham Carter (prinses Margaret in The Crown, 2016-nou).
ABOMINABLE (2019)
’n Groep tieners ontdek jeti’s bestaan werklik – en hulle is oulik, wollerig en skattig ondanks hul grootte en voorkoms. Die ware monsters in dié animasiefliek is die sakemanne en die dierkundiges wat die jeti probeer vang om in ’n dieretuin as toeriste-attraksie te sit om geld te maak. Maar om ’n jeti in die hande te kry, moet die slegte ouens eers die kinders uitoorlê. Stem:
Sarah Paulson ( Wilhelmina, Billie Dean en Cordelia in American Horror Story: Apocalypse, 2019).
HOW TO TRAIN YOUR DRAGON 1, 2 & 3 (2010-2019)
’n Lamsakkige Viking-prins genaamd Hiccup vind ’n vriend in Toothless, ’n “night fury”- draak in dié aangepaste weergawe van Cressida Cowell se gelyknamige boek van 2003. Moenie soek na ’n vuurspuwende draak met skubbe en skerp kloue nie. Toothless het inderwaarheid al die minsame elemente van ’n seekoei – hy is klein, rond en effens geset. Maar moenie aan sy verkeerde kant beland nie – “night fury”- drake het nie sonder rede hul reputasie verwerf nie. Stem: Jay Baruchel (Sean in The Moodys, 2019-nou).
HOME (2015)
In sci-fi-flieks vir volwassenes lyk die ruimtewesens soos iets uit ’n nagmerrie. Hulle het groot swart oë en lang stokkerige vingers. In dié animasiefliek is die ruimtewese Oh, wat liefderyk lyk, ’n uitgeworpene op sy planeet en hy raak bevriend met ’n verlore meisietjie, Tip. Saam probeer hulle Tip weer tuis by haar ma kry en ontwikkel die beminlikste band met mekaar wanneer Oh ontdek hy is nie so sleg soos wat sy spesie hom laat voel nie. Stemme: die sangeres Rihanna (2005- enkelsnittreffer Pon De Replay) en Jim Parsons (Sheldon Cooper in The Big Bang Theory, 2007-2019).