Ontrafel ware misdaad
Aanhangers van tradisionele ondersoeke soos in die ou dae sal dol wees oor The Real Prime Suspect op CBS Justice (*170). Ontmoet die aanbieder en oudspeurder Jackie Malton.
Prime Suspect, die polisie-speurdrama wat van 1991 tot 2006 uitgesaai is, het gedraai om die sake wat deur die bedrewe hoofspeurder
Jane Tennison (Helen Mirren, Queenie Shaw in die 2019aksiefliek Hobbs & Shaw) opgelos is. Jane was deels gegrond op Jackie Malton – ’n suksesvolle speurder in die Britse polisiemag wat die inspirasie was vir die skrywer Lynda la Plante se boeke en die reeks. Nou bied Jackie The Real Prime Suspect (2020) aan, ’n dokumentêre reeks oor regte Britse moordsake, met behulp van beamptes en verskeie misdaadkenners. Sy het tvplus vertel waarom dit die moeite werd is om dié program te kyk.
Wat maak The Real Prime Suspect uniek?
Dis ’n oudspeurder wat met ander speurders praat. Baie van hulle is afgetree en het fantastiese werk gedoen aan sake voor daar toegang tot DNS, kringtelevisie, die sosiale media, ens., was; dus polisiëring uit die ou dae.
Waarvoor moes julle versigtig wees in die maak van die program?
Ons moes natuurlik die slagoffers se families in gedagte hou. Dit was die eerste vereiste in die benadering tot dié sake. Ons moes dit nie obseen of na uitbuiting laat lyk nie.
Was daar spesifieke sake wat jou bygebly het?
Elkeen het my om verskillende redes bygebly. Die reeksmoordsake en dié waarby kinders betrokke was, sal my altyd bybly. Indien ek een moet uitsonder, sal dit die een wees waartydens die man sy vrou en nege maande oue baba vermoor het. Ek kan my nie indink hoe iemand so iets kan doen nie.
Jou tyd in die polisiemag is deur Helen Mirren in Prime Suspect uitgebeeld. Hoe akkuraat was dit?
Buiten dat die karakter heteroseksueel was, was dit baie akkuraat. Ek het gereeld met [die skrywer] Lynda gepraat en ons het ure lank oor my ervaring gesels. Ek is nie Jane Tennison per se nie, maar daar is baie van my in Tennison.
• Kyk agtereenvolgende episodes van The Real Prime Suspect op CBS Justice (*170) op Sa. 29 en So. 30 Aug. vanaf 16:00.