Die prins van vermaak
Bennie Fourie oorheers die rolprentbedryf met sy talent in alle fasette van die kuns.
Seisoen 3 Maandae kykNET (*144) 20:30
Die 32-jarige Bennie Fourie is ’n man met vele talente. Hy pronk tans op TV as ’n korrespondent in die komediereeks Die Ware Naarheid (2018-nou), maar het jy geweet hy sit ook gemaklik in die regiestoel en is boonop ’n kranige draaiboekskrywer?
Bennie hou daarvan om besig te bly. “Dis wanneer ek my beste werk lewer – wanneer daar min tyd en die druk groot is,” sê Bennie. Om stil te sit is iets wat hy al van kleins af net nie kan bemeester nie. Hy was as skoolseun in 2005 junior burgemeester van Pretoria, en tydens sy studentejare aan die Noordwes-Universiteit se Potchefstroom-kampus was hy in elke koshuiskommitee denkbaar – en toe sommer ook in 2011 primarius van die Hombrémanskoshuis.
Die Ware Naarheid is een van die projekte wat sy rooimiere nou hokslaan, maar op die agtergrond werk hy reeds aan nuwe projekte wat hom verder gaan vestig as die prins van vermaak.
KLAAR TUIS
Bennie was in seisoen 1 en 2 van Die Ware Naarheid op die agtergrond betrokke as die een wat die gehoor se litte los gekry het.
“Voor die pandemie is dit regstreeks voor ’n gehoor opgeneem, en ek sou
standup comedy doen en grappies vertel om hulle in ’n goeie bui te kry voor ‘aksie’ geroep word,” verduidelik Bennie.
Met seisoen 3 vanjaar het die vervaardigers Bennie gevra of hy voor die kameras wil wees as ’n korrespondent. “Ek was reeds tuis in die produksie en het sonder om te twyfel ‘ja’ gesê,” vertel Bennie.
Die insetsel wat Bennie op Die Ware Naarheid behartig, is Die Man Op Straat. “Ek verteenwoordig die man op straat in my korrespondensie en praat oor sake wat Jan Alleman raak.” Soos die onlangse skietery in Julie in die Centurion-kerk in Pretoria waarin Pieter van der West
huizen (broer van die oudSpringbokrugbyspeler wyle Joost van der Westhuizen) twee rowers doodgeskiet het waaroor
Bennie geklets het in episode 5 (dis op 3 Augustus uitgesaai).
DIE LIGTER KANT VAN DIE NUUS
Geweldige harde werk gaan in die beplanning van een episode van Die Ware Naarheid. “Die produksiespan hou op ’n Dinsdag nadat ’n episode van Die Ware Naarheid uitgesaai is, ’n digitale vergadering en dan brainstorm ons oor die volgende episode om dit so vars moontlik te hou. Om dít reg te kry, moet jy soveel nuusberigte lees as wat jy kan en dink hoe jy die ligter kant daarvan kan verwoord – en dis nie so maklik soos wat dit klink nie.”
Maar met Bennie se agtergrond in die improvisasie- groep Lagnes (20072012) en sy skryf- en regiewerk aan die komedieflieks Vuil Wasgoed (2017), Ander Mens (2019) en die reeks Hotel (2016-nou), is Bennie al gekonfyt om humor in ernstige dinge raak te sien.
OP ’N PERSOONLIKE NOOT
Bennie is passievol oor die vermaakbedryf. Maar iets wat hom ook baie na aan die hart lê, is sy familie. Bennie se pa, ds. Ben Fourie, is in Junie vanjaar oorlede aan ’n aneurisme van sy hart. “Dit was baie erg,” erken Bennie. “Hy was ’n ongelooflike mens en altyd gereed om ’n grappie te vertel. My pa was ’n showman in sy hart, hy het nege instrumente bespeel en ek mis hom elke dag.”
Bennie sien daarna uit om met sy eie gesin te begin, maar tans soek hy nog na die regte vrou. “Ek sal graag in ’n verhouding wil wees, al my sibbe is al getroud, en dis iets waarna ek ook smag. Maar net die tyd sal leer.”
Intussen woeker hy voort. “Ek en Schalk
Bezuidenhout (die aanbieder van Die Ware Naarheid) werk klaar aan ’n aanlyn-sketskomedie. En ek en my broers, Wilbrie en Reynold, werk ook aan ’n leefstylreeks genaamd Die Broer Toer waar ons die land op motorfietse gaan platreis.”
As alles mooi uitwerk, sal die sketskomedie later vanjaar op die internet te sien wees en Die Broer Toer volgende jaar op kykNET.
Tyd vir stilsit is daar beslis nie – al sou hy dan ook wou!