Wikkel daai lyf
In The Greatest Dancer word die vlugvoetiges geskei van dié wat net linkervoete het.
The Greatest Dancer
Seisoen1 Saterdae SABC3 (*193) 19:30 (begin 29 Augustus)
Simon Cowell (beoordelaar op byna elke denkbare talentsoekprogram, soos Britain’s Got Talent, 2007-nou) het die gawe om nie net talentvolle mense raak te sien nie, maar ook om goeie programme te sien.
Met The Greatest Dancer (20192020) het hy ’n kompetisieprogram geskep wat ’n mengsel is van The X-Factor UK (2004-nou) en The Voice (2011-nou), maar met dans pleks van sing. En anders as ander programme is dit toeganklik vir enigeen ter wêreld. “Ons het gedink: ‘Waarom, nie?’ Daar is so baie dansstyle in die wêreld, indien jy tot hier kan kom en optree, is die verhoog joune,” sê die 60-jarige Simon. Wat is op die spel? ’n Kontantprys van £50 000 (R1,15 miljoen) en ’n geleentheid om in die ikoniese Britse talentprogram Strictly Come Dancing (2004nou) op te tree.
WEN HUL GUNS
Die klem in The Greatest Dancer is op dans, daar is dus geen aanstellerige aanmerkings oor hoe die deelnemers nie die “x-faktor” of ’n sekere voorkoms het nie. “Dit vier dans in al sy vorme.
Jy gaan dus elke denkbare styl sien, van soliste tot groot dansgroepe, van professioneel afgerigte kunstenaars tot amateurs,” verduidelik die netwerk BBC, wat die program in vennootskap met Simon se maatskappy, SYCOtv, vervaardig het.
Daar is ’n kinkel. Die oudisie word voor ’n eenrigtingspieël gedoen, die dansers sien dus nie die gehoor nie. En die mag is in die hande van die ateljeegehoor – indien hulle van ’n optrede hou, druk hulle hul knoppies en skakel hul sitplekligte aan. Jy moet 75% van hul stemme verwerf om vir die volgende ronde teruggeroep te word. Amper soos in die gladiatorarena – as jy nie die mense vermaak nie, keur hulle jou af.
DIE KENNERS
Simon het beoordelaars uitgesoek wat presies weet hoe ritme en dans bymekaar pas. Hulle word “kapteins” genoem en gaan die deelnemers en die program help.
Jy ken hulle almal.
Cheryl Tweedy was saam met Simon ’n beoordelaar in The X-Factor UK, maar voor dit was sy ’n popster met platinum-status en ’n danser van Girls Aloud, wat saamgestel is tydens Popstars: The Revival in 2002. “Ek is so opgewonde om deel te wees van The Greatest Dancer. Ek soek na optredes met ware passie, wat die grense gaan verskuif en alles insit ondanks al die uitdagings wat hulle ervaar. Uit eie ondervinding weet ek watter toewyding dans vereis. Ek kan nie wag om te begin nie.”
Matthew Morrison (die onnie Will Schuester in Glee, 2009-2015) was op Broadway en gebruik sy vaardighede om opkomende talent te ontwikkel. Dié Amerikaanse akteur onthou sy tyd as ’n danser en wens hy het ’n mentor gehad. “Dis so ’n kragtige oomblik. Dis wonderlik om te kan voortgaan om dans (en musiek) in mense se lewe te bring, soos in Glee.” En kaptein #3 is die SuidAfrikaans gebore beroepsdanser van Strictly Come Dancing UK Oti Mabuse, wat ’n ander soort intensiteit by die program sal voeg. “Ek soek na ’n danser wat emosie van die gehoor kan ontlok. Ek weet hoe dit voel as jou dans of choreografie beoordeel en gekritiseer word. Hulle moet vuur en vlam wees en alles insit, want dit is die geleentheid van jou lewe.”
UIT DIE VOETE GEMAAK
Die BBC het ná seisoen 2 in Maart die program gekanselleer al het
3,2 miljoen kykers elke episode gekyk. Maar Simon was toe reeds weg – hy het glo in middel 2019 die regte vir £19 miljoen (R435 miljoen) verkoop en sy maatskappy, SYCOtv, het in April aangekondig hy ontwikkel The Magnificent Dancer in China.