Leer weer liefhê
Ses dapper vroue wat hul manne gelos het, waag nóg ’n kans op die liefde in die plaaslike afspraakprogram The Single Wives SA.
Seisoen 1 Donderdae M-Net (*101) 19:00 (begin 3 September)
Om ná ’n egskeiding weer die kringloop van ongemaklike toe-oë-afsprake te betree en talle paddas te soen met die hoop dat een in ’n prins gaan verander, kan skrikwekkend wees. Maar ses geskeide vroue wat nie geluk met liefde kan vind nie, het hul vrese opsy geskuif en het afsprake weer ’n kans gegun in die nuwe realiteitsprogram The Single Wives SA. Dit is die plaaslike weergawe van die enkelseisoen Australiese reeks Single Wives (2018), en die aanbieder-afrigters
Justin Cohen en Mapaseka Mokwele gaan dié vroue hopelik na liefde lei.
Die vroue gaan vir ses weke saam woon waartydens hulle gaan deelneem aan aktiwiteite soos blitsafsprake, wat hulle nie net na die ware Jakob sal lei nie, maar ook hul eiewaarde laat ontdek. “The Single Wives SA is meer as net ’n afspraakprogram. Dit gaan oor transformasie,” sê Justin, ’n motiveringspreker, skrywer van ’n selfhelpboek en wat ook ’n kletsprogram,
Guru (2017), op CBNAfrica (*410) aangebied het. “Die klem is daarop om dié vroue te help om die beste weergawe van hulleself te word sodat hulle ’n gelukkige, doelgerigte lewe kan lei. Die ou is ’n bonus,” voeg Justin by.
TWEEDE KANSE
Elke week word die vroue gedwing om hul onsekerhede te erken, asook die waarheid oor hulleself wat hulle verhinder om liefde te vind. “Dié vroue is al lank uit die [afspraak-] kringloop.
Ons moedig hulle aan om na binne te kyk en te verstaan wat hulle in verhoudings soek. Jy moet jouself liefhê en verstaan voor jy ’n verhouding aanknoop. Indien jy nie jouself liefhet nie, hoe kan jy verwag iemand anders moet jou liefhê?” verduidelik Mapaseka.
Die program het ook ’n pretkant – die vroue gaan op romantiese etes, spaafsprake en staptogte. “Daar word baie gelag in The Single Wives SA en daar is talle oomblikke waar die vroue saamkom,” voeg die radio-omroeper Mapaseka by. Sy was van 2013-2016 ook aanbieder van die geselsprogram Motswako (2003-nou). “Mans en vroue kan met dié program vereenselwig. Dis vermaaklik en opvoedkundig en jy sal sien hoe dié vroue vriendskappe vorm.”